प्लाॅट विक्रीत फसवणुकीची तक्रार

नंदुरबार : प्लाॅट विक्रीमधून दोघांनी फसवणूक केल्याची तक्रार शहर पोलीस ठाण्यात करण्यात आली आहे. याप्रकरणी दखलपात्र गुन्हा दाखल करून न्याय मिळावा, अशी मागणी करण्यात आली आहे.

याविषयी दिलेल्या तक्रारीत तक्रारदार शरद मंगा मराठे यांनी म्हटले आहे की, नंदुरबारमध्ये आर. के. कन्ट्रक्शन नावाने रवींद्र मराठे हे प्लाॅट विक्री व घर बांधकाम करून विक्री करतात. त्यांनी आपल्याला २००९मध्ये शहरालगत पथराई शिवारात हप्त्याने प्लाॅट विक्रीची स्कीम सुरू असून, त्याठिकाणी सुलभ हप्त्याने प्लाॅट देण्याचे आमिष दाखवून पूर्ण हप्त्याचे पैसे घेतले. परंतु, प्लाॅट नावावर करण्याची वेळ आली, त्यावेळी त्यांनी टाळाटाळ केली. ज्या जागेवर प्लाॅट दिला जाणार होता, त्या जागेचे कागदपत्र पाहिले असता, ती जागा २००८मध्येच दुसऱ्याला विकल्याचे स्पष्ट झाले आहे. आता ते पैसे परत देण्यास व प्लाॅट देण्यासही टाळाटाळ करत असून, धमकी देत असल्याचे तक्रारीत म्हटले आहे. आपल्यासोबत इतरही अनेकांची त्यांनी अशाचप्रकारे फसवणूक केल्याचेही या तक्रारीत म्हटले आहे.