प्रतिबंधीत रस्त्यांवरून वाहनांची ये-जा सुरू

लोकमत न्यूज नेटवर्क
नंदुरबार : गणेशोत्सव काळात मोठा मारुती ते जळका बाजार आणि सोनार खूंट ते साक्री नाका या रस्यांवर तीन व चारचाकी वाहनांना प्रवेश बंदी करण्याचा निर्णय घेण्यात आला असतांनाही त्याची अंमलबजावणी होत नसल्याचे चित्र आहे. त्यामुळे या रस्त्यांवर वारंवार वाहतूक ठप्प होत असते. पोलीसांनीच त्यांच्या विभागाच्या आदेशाला केराची टोपली दाखविल्याचा हा प्रकार असल्याचे नागरिकांमधून बोलले जात आहे.
गणेशोत्सवाच्या काळात शिवाजीरोड आणि टिळक रोडवर मोठ्या प्रमाणावर रहदारी खोळंबते. शिवाजीरोड ते मोठा मारुती मंदीरापर्यंतच्या रस्त्यावर दादा गणपती तसेच इतर मोठ्या मंडळांचे गणपती आहेत. शिवाय टिळक रोड ते साक्रीनाका दरम्यान बाब गणपती व इतर मंडळांचा गणपती आहे. त्यामुळे या काळात या मार्गावर तीन व चारचाकी वाहनांना प्रवेश बंदी करण्यात आली होती. तसा अधिकृत आदेश पोलीस अधीक्षकांनी २० आॅगस्ट रोजीच काढला होता.
या भागात ध्वनीक्षेपकाद्वारे नागरिकांना सुचीतही करण्यात आले होते. असे असतांनाही पहिल्या दिवसापासून या आदेशाचे पालनच झाले नसल्याचे चित्र आहे. सर्रास चार चाकी वाहने व तीन चाकी प्रवासी वाहने या रस्त्यांवरून ये-जा करतात.
वाहतूक पोलिसांची ड्युटी या भागात लावणे आवश्यक असतांना वाहतूक पोलीस शहराच्या चारही बाजुंच्या रस्त्यांवर उभे राहून आपल्या टार्गेटसाठी दंडाच्या पावत्या फाडण्यात व्यस्त असतात. त्यामुळे पोलीस उपअधीक्षकांच्या आदेशाला त्याच्याच विभागाने जुमानले नसल्याच्या प्रतिक्रिया शिवाजीरोड आणि टिळक रोडवरील नागरिकांमधून व्यक्त होत आहेत.
आता किमान गणेशोत्सवाच्या शेवटच्या पाच दिवसात तरी या आदेशाची कडक अंमलबजावणी व्हावी अशी अपेक्षा शहरवासीयांमधून तसेच या भागातील गणेश मंडळ कार्यकर्त्यांमधून व्यक्त होत आहे.