विसरवाडी महामार्ग पोलीस मदत केंद्राकडून मिळालेल्या माहितीनुसार, कारमधील (क्रमांक जी.जे.०५ आरएच. ५१६८) प्रवासी अमळनेर येथून लग्न समारंभ आटोपून सुरतकडे येत असताना नेर गावाजवळ समोरून येणारा ट्रक यांच्यात ५ एप्रिल रोजी सायंकाळी सुमारे आठ ते साडेआठच्या सुमारास अपघात झाला. त्यात दोन्ही वाहने उलटली. मात्र शॉर्टसर्किट झाल्याने ट्रकला आग लागली व आगीने काही क्षणातच रौद्र रूप धारण करून संपूर्ण ट्रक व त्यात असलेला लाखो रुपयांचा नायलॉन साबुदाणा जळून खाक झाला. तर कारचा चक्काचूर झाला. त्यातील चार प्रवाशांना गंभीर जखमी अवस्थेत महामार्ग पोलीस यांच्या मदतीने १०८ रुग्णवाहिकेतून धुळे येथे वैद्यकीय उपचारासाठी दवाखान्यात हलविण्यात आले.
दरम्यान, ट्रकला लागलेली आग विझविण्यासाठी अग्निशमन दलाच्या बंबाला पाचारण करण्यात आले. या भीषण अपघातानंतर वाहतूक काही काळ खोळंबली होती. घटनेची माहिती मिळताच विसरवाडी महामार्ग पोलीस मदत केंद्र सहायक पोलीस निरीक्षक आर.एम. काझी, पोलीस कॉन्स्टेबल दीपक चौधरी, संदीप बारसे, बच्छाव, सुनील चौधरी हे दाखल झाले.