अंगणवाडी भरतीसाठी महिलांच्या वयाची अट शिथिल करावी

निवेदनात, अंगणवाडी सेविका भरती प्रक्रियेला सुरुवात झाली असून, नंदुरबार जिल्हा आदिवासी बहुल जिल्हा असल्या कारणाने अनेक इच्छुक पात्र महिला बेरोजगार असून, नोकरीच्या शोधात फिरत आहेत. अंगणवाडी भरती प्रक्रियामध्ये अनेक महिलांना रोजगार मिळणार आहे. परंतु, काही महिला भरती प्रक्रियेपासून वंचित आहेत. हा त्यांच्यावर अन्याय आहे. तळोदा तालुक्यात २०१७-१८ नंतर तब्बल चार वर्षांनंतर आताच भरती प्रक्रिया सुरू झाली आहे. २०१७-१८ नंतर लोकसभा, विधानसभा, ग्रामपंचायत, स्थानिक स्वराज्य संस्थांच्या निवडणुका अशा वेगवेगळ्या कारणांमुळे भरती प्रक्रिया रखडली होती. तसेच कोरोना यासारख्या महाभयंकर महामारीमुळे भरती प्रक्रिया थांबली होती. यामुळे अनेक इच्छुक पात्र महिलांचे वय तब्बल चार वर्षांनी वाढले आहे. त्यामुळे या महिलांवर अन्याय होत असल्याने वयामध्ये शिथिलता देऊन त्यांना न्याय देण्याचा निर्णय घेण्यात यावा, अशी मागणी करण्यात आली आहे. यावेळी संघटनेचे नंदुरबार जिल्हा प्रवक्ता गणपत पाडवी, मुकेश पाडवी, सुरेश पाडवी, दीपक वळवी, आदी कार्यकर्ते उपस्थित होते.