पोलीस सूत्रांनुसार, नंदुरबार येथील उपविभागीय पोलीस अधिकारी सचिन हिरे यांना नंदुरबार येथील गोसेवक डॉ.नरेंद्र पाटील व त्यांच्या सहकाऱ्यांनी माहिती दिली की, नंदुरबारहून विसरवाडीमार्गे मालेगाव येथील आयशानगर येथे कत्तलीसाठी गोवंश भरलेली मालट्रक जाणार आहे. याबाबत त्यांनी त्वरित विसरवाडी पोलिसांना माहिती दिली, यावरून विसरवाडी पोलीस ठाण्याचे सहायक पोलीस निरीक्षक नितीन पाटील, हवालदार सुरेश मोरे, अनिल राठोड, भोजराज धनगर, विश्वनाथ नाईक, वाहन चालक राजू कोकणी यांच्या पथकाने पोलीस ठाण्याजवळ बेरॅकेट लावून नाकाबंदी केली.
यावेळी वाहनांची तपासणी करीत असताना, एक ट्रक(क्र.एम.एच.४८जे.१२६४)भरधाव वेगाने येताना दिसला. तो ट्रक अडवून चालकास विचारणा केली असता, त्याने उडवाउडवीची उत्तरे दिली. यावेळी विसरवाडी पोलिसांनी ट्रकची तपासणी केली असता, त्यामध्ये अत्यंत निर्दयपणे नऊ गाई, सहा बैले, सहा वासरे असे एकूण २१ गोवंश पाय तोंड बांधून कोंबण्यात आलेली होती.
या प्रकरणी विसरवाडी पोलिसांनी ट्रक चालक शेख मोबीन शेख उस्मान, सहचालक रिजवान खान इब्राहिम खान, हमाल साजिद अहमद रियाज अहमद, मालक मोहम्मद मुस्ताक इन मोहम्मद रफीक सर्व रा.मालेगाव या चार जणांना अटक केली असून, ट्रकमधील एक लाख ६० हजार रुपये किमतीचे गोवंश व दहा लाख रुपये किमतीचा ट्रक असे ११ लाख ६० हजार रुपयांचा मुद्देमाल जप्त केला आहे.
ही कारवाई पोलीस अधीक्षक महेंद्र पंडित, अप्पर पोलीस अधीक्षक पवार, उपविभागीय पोलीस अधिकारी सचिन हिरे यांच्या मार्गदर्शनाखाली सहायक पोलीस निरीक्षक नितीन पाटील व त्यांच्या सहकाऱ्यांनी केली.
दरम्यान, निर्दयपणे गोवंश कोंबून भरधाव वेगाने धावणाऱ्या ट्रकचा नंदुरबार येथील गोसेवक डॉ.नरेंद्र पाटील, भूषण पाटील, विशाल जयस्वाल व त्यांच्या सहकाऱ्यांनी पाठलाग केला असता, ट्रकमधील संशयितांनी त्यांच्यावर मिरचीची पूड फेकली. मात्र, त्यांनी ट्रकचा पाठलाग सोडला नाही. या दरम्यान, ते सातत्याने पोलिसांच्या संपर्कात होते. आपल्या जीवाची पर्वा न करता, या गोसेवकांनी आपले कर्तव्य पार पाडले.
२१ जनावरांना नंदुरबार येथील चौपाळा गोसेवा केंद्रात पाठविण्यात आले आहे. विसरवाडी पोलीस ठाण्यात संशयितांविरुद्ध प्राणी संरक्षण कायद्यांतर्गत गुन्हा दाखल करण्यात आला आहे.