सुप्त संघर्षातून नांदेडमध्ये शिंदेसेनेकडून अशोक चव्हाण टार्गेट; भाजपची मात्र संयमी प्रतिक्रिया

जिल्ह्यात १२ नगरपरिषदा आणि एका नगरपंचायतीची निवडणूक असली तरी, सर्वांचे लक्ष हे खासदार अशोकराव चव्हाण यांची कन्या आमदार श्रीजया चव्हाण यांच्या भोकर, मुदखेडकडे

- शिवराज बिचेवार

नांदेड- महायुतीत भाजप आणि शिवसेनेच्या राज्यपातळीवरील नेत्यांमध्ये काही दिवसांपासून सुप्त संघर्ष सुरू झाला आहे. या संघर्षाचे पडसाद स्थानिक स्वराज्य संस्थांच्या निवडणुकीतही उमटत आहेत. नांदेड जिल्ह्यात शिवसेना शिंदे गटाच्या आमदारांकडून युती तोडण्यासाठी खासदार अशोकराव चव्हाण हेच कारणीभूत असल्याचा आरोप केला जात असताना प्रचारासाठी आलेल्या शिंदेसेनेच्या मंत्र्यांकडूनही भाजपाचे जिल्ह्यातील नेतृत्वच टार्गेट केले जात आहे. याउलट, भाजपाकडून मात्र सध्या तरी संयमाने प्रतिक्रिया दिल्या जात आहेत.

जिल्ह्यात १२ नगरपरिषदा आणि एका नगरपंचायतीसाठी निवडणूक सुरू आहे. या निवडणुकीच्या प्रचारात महायुती सुसाट सुटली असली तरी महाविकास आघाडीचे मात्र प्रदेशाध्यक्ष हर्षवर्धन सपकाळ वगळता कुणीही जिल्ह्यात फिरकले नाही. प्रचारासाठी आता शेवटचे तीन दिवस उरले आहेत. परंतु, महायुतीत शिवसेना शिंदे गट आणि अजित पवारांच्या राष्ट्रवादीकडून भाजपावरच सर्वाधिक टीकेची झोड उठविली जात आहे. शिवसेना शिंदे गटाचे आमदार हेमंत पाटील, राष्ट्रवादीचे प्रतापराव चिखलीकर हे खासदार अशोकराव चव्हाण यांच्यावर टीकेची एकही संधी सोडताना दिसत नाहीत. तर दुसरीकडे शिंदे सेनेच्या राज्य पातळीवरील नेत्यांचेही मुख्य लक्ष्य हे अशोकराव चव्हाण हेच आहेत. मंत्री संजय शिरसाठ, गुलाबराव पाटील, खासदार श्रीकांत शिंदे यांच्याकडूनही चव्हाणांवर टीका करण्यात आली. खासदार चव्हाण यांच्याकडून मात्र आरोप-प्रत्यारोप आणि कुरघाेड्या करून विकास करता येत नाही, असे म्हणत सकारात्मक भूमिका घेऊन चालत असल्याची संयमी प्रतिक्रिया येत आहे.

सर्वांचे लक्ष भोकर, मुदखेड आणि लोहा-कंधारवरजिल्ह्यात १२ नगरपरिषदा आणि एका नगरपंचायतीची निवडणूक असली तरी, सर्वांचे लक्ष हे खासदार अशोकराव चव्हाण यांची कन्या आमदार श्रीजया चव्हाण यांच्या भोकर, मुदखेड आणि राष्ट्रवादीचे आमदार प्रतापराव चिखलीकरांच्या मतदारसंघातील लोहा-कंधार या नगरपरिषदेच्या निवडणुकीकडे लागले आहे. त्यात लोहा-कंधार नगरपरिषदेसाठी मुख्यमंत्री देवेंद्र फडणवीस आणि उपमुख्यमंत्री अजित पवार यांच्या सभा झाल्या आहेत. दोन्ही नेत्यांचा सर्वाधिक वेळ या चार नगरपरिषदांमध्ये प्रचारासाठी जात आहे.

मुदखेडमध्ये भाजपा-काँग्रेस, भोकर-भाजपा-काँग्रेस-राष्ट्रवादी, देगलूर-काँग्रेस-राष्ट्रवादी, हिमायतनगर-काँग्रेस-भाजपा-शिवसेना (शिंदे), हदगाव- भाजप आणि शिंदेसेना एकत्र, तर दोन्ही राष्ट्रवादींचा घरोबा, काँग्रेस आणि उबाठा स्वतंत्रपणे रिंगणत, धर्माबाद- मराठवाडा जनहित पार्टी-राष्ट्रवादी-भाजपा- शिवसेना, कुंडलवाडी- शिवसेना-भाजप-राष्ट्रवादी, लोहा- राष्ट्रवादी-भाजप, कंधार- भाजप-राष्ट्रवादी-काँग्रेस, किनवटमध्ये-भाजपा-शिवसेनेची युती, उबाठा आणि राष्ट्रवादी काँग्रेस (शरद पवार) यांची आघाडी. काँग्रेस स्वतंत्रपणे रिंगणात उतरली आहे. बिलोली येथे मराठवाडा जनहित पार्टी-राष्ट्रवादी-काँग्रेस-शिवसेना (शिंदे गट), मुखेड- भाजपा आणि शिवसेना (शिंदे गट) तर उमरीत भाजपा आणि राष्ट्रवादीत लढत होणार आहे.