नागपूर : कोरोनाची साखळी आणि संसर्गावर नियंत्रणासाठी राज्य शासनाने कठोर निर्बंध लावले आहेत. वीकेंड लॉकडाऊनच्या दुसऱ्या दिवशी रविवार असल्याने बाजार तर बंद होता. मात्र अनेक जण विनाकारण घराबाहेर पडून रस्त्यांवर फिरताना दिसून आले. आश्चर्याची बाब म्हणजे जमावबंदी असतानादेखील मैदानांवर खेळ सुरू होता व मुख्य रस्त्यांवरील कट्ट्यांवर लोक एकत्रित येऊन गप्पा मारताना दिसले. विशेष म्हणजे नियम तोडणाऱ्यांवर कडक कारवाई करू हा पोलीस आयुक्तांचा दावा हवेतच राहिला. अनेक ठिकाणी तर पोलिसांचा नावालादेखील बंदोबस्त नव्हता.
महाल, इतवारी, मस्कासाथ, गांधीबाग, सीताबर्डी, खामला, जरीपटका, सक्करदरा, कमाल चौक येथील बाजारपेठा पूर्णत: बंद होत्या. शनिवारप्रमाणे रविवारी व्यापारी बाजारपेठांमध्ये दिसले नाहीत. कळमना येथील भाजीबाजार व कॉटन मार्केट बाजारपेठेत सकाळी ९ पर्यंत भाज्यांची खरेदी-विक्री झाली. मात्र शहरातील इतर भागांत वीकेंड लॉकडाऊनचे हवे तसे पालन झाले नाही. प्रशासनाकडून दावे करण्यात येत असले तरी प्रत्यक्षात अनेक लोक घराबाहेर निघाले होते. विशेषत: रविवारी सकाळी ढगाळलेले वातावरण असल्याने बरेच जण तर वातावरणाचा आनंद घेण्यासाठी घराबाहेर निघाल्याचे दिसून आले. दक्षिण-पश्चिम नागपूर व पश्चिम नागपुरात हे प्रमाण जास्त होते. सायंकाळी अनेक नागरिक रस्त्यावर फिरताना दिसले.
पोलीस बंदोबस्त कडक कधी होणार?
पहिल्या लॉकडाऊनच्या वेळी पोलिसांनी कडक भूमिका घेतल्याने लोकांनी विनाकारण घराबाहेर निघण्याचे टाळले होते. वीकेंड लॉकडाऊनमध्ये नियम तोडणाऱ्यांवर कारवाई करू, असा दावा पोलीस आयुक्तांनी केला होता. प्रत्यक्षात लोक घराबाहेर निघत होते व दिवसा साधे पेट्रोलिंगदेखील दिसून आले. पोलिसांचे वाहन गेले तरी लोकांना हटकण्याची तसदी घेण्यात येत नव्हती. काही चौकात नाकाबंदी होती. मात्र लोकांची विचारपूस करण्यावर जास्त भर नव्हता. पोलीस बंदोबस्तच कडक नसल्याने स्प्रेडर्स कुठल्याही भीतीविना बाहेर फिरताना दिसून आले.