लोकमत न्यूज नेटवर्क
नागपूर - बेवारस आहो... अंत्यविधी बेवारससारखाच करा. कुणाबद्दल काही तक्रार नाही, असे लिहून ठेवत बारमधील एका वेटरने गळफास लावून आत्महत्या केली. हुडकेश्वर पोलीस ठाण्याच्या हद्दीत सोमवारी रात्री घडलेल्या या आत्महत्येच्या घटनेने पोलिसांना अस्वस्थ करून सोडले आहे.
मृत व्यक्तीचे नाव संजय मिश्रा (रा. फ्रेजरपुरा, अमरावती) असे सांगितले जात असले तरी ते त्याचे खरे नाव आहे की नाही, याबाबत पोलिसांना शंका आहे. संजय एका बारमध्ये वेटर म्हणून काम करायचा. न्यू म्हाळगीनगर, बेसा पॉवर हाऊसजवळ एक घटस्फोटित महिला राहते. तिला दोन मुले असून, दुसऱ्यांकडे पोळ्या लाटायचे काम करून ती आपला उदरनिर्वाह करते. दोन महिन्यापासून संजय तिच्याकडे अधूनमधून जात-येत होता. सोमवारी रात्री ७ ते ८ च्या दरम्यान त्याने या महिलेच्या घरी गळफास लावून आत्महत्या केली. तत्पूर्वी त्याने लिहून ठेवलेली सुसाईड नोट पोलिसांच्या हाती लागली. त्यात त्याने ‘बेवारस आहो, आपले कुणीही नाही. अत्यंविधी करा, कुणाबद्दल काही तक्रार नाही’, असे लिहून ठेवले असल्याचे पोलीस सांगतात. दरम्यान, त्याची ओळख पटविण्यासाठी पोलिसांनी त्याच्या मोबाईलचा सीडीआर काढला. मात्र, त्यातून तो संजय मिश्राच आहे की दुसरा कुणी, अशी शंका निर्माण झाली. त्यामुळे पोलीस अस्वस्थ झाले आहेत. चित्रा गायकवाड हिच्या तक्रारीवरून पोलिसांनी अकस्मात मृत्यूची नोंद केली. पुढील तपास सुरू आहे.