दोन महिलांनी केली सुटका
घुग्घुस (चंद्रपूर) : नवविवाहितेच्या चारित्र्यावर संशय घेऊन तिला मारहाण केली. तिला सिगारेटचे चटके दिले. एवढ्यावर हा पती महाशय थांबला नाही, तर चक्क तिच्या डोक्यावरचे केस कापून तिला दोन महिने घरात डांबून ठेवले. शेजारच्यांना हा प्रकार लक्षात येऊ नये, यासाठी सुरक्षा भिंतीलाही कुलूप लावून डाबरमन कुत्र्याला रखवालदार म्हणून ठेवले. मात्र माहेरी ही बाब लक्षात येताच त्यांनी दोन महिला व पोलिसांच्या सहकार्याने नवविवाहितेची सुटका केली. घुग्घुस पोलिसांनी आरोपी पती भास्कर ठवसे (४२) याला अटक केली आहे. विशेष म्हणजे, त्याचे सहा वेळा लग्न झाल्याची माहिती आहे. घुग्घुस केमिकल वॉर्डात राहणारा व लॉयड मेटलमध्ये सुरक्षा गार्ड म्हणून कार्यरत असलेला भास्कर ठवसे याची आतापर्यंत सहा लग्न झाली.
मात्र त्याच्या विकृत मानसिकतेमुळे आधीच्या सर्व पत्नी त्याला सोडून गेल्या. आता चंद्रपूर जिल्ह्यातील पोंभूर्णा तालुक्यातील एका गावच्या २२ वर्षीय मुलीशी दोन महिन्यापूर्वी त्याने लग्न केले. लग्नानंतर आठ दिवस सुखात घालविले. त्यानंतर त्या पती महाशयाने नवविवाहित पत्नीच्या चारित्र्यावर संशय घेऊन दररोज मारहाण, सिगारेटचे चटके देऊन मानसिक व शारीरिक त्रास देणे सुरू केले. दरम्यान, त्याने आपल्या पत्नीच्या डोक्यावरील केसही कापून टाकले. आपण करीत असलेले कृत्य इतरांना कळू नये, म्हणून त्याने घराचे दरवाजे व खिडक्या कुलूपबंद केले आणि तिच्याकडे कुणी येऊ नये, याची काळजी घेत सुरक्षा भिंतीच्याही गेटला कुलूप ठोकले. तरीही ती पळून जाऊ नये, याकरिता डाबरमन कुत्रा रखवालदार म्हणून तिथे तैनात ठेवूनच तो कामावर जायचा. काही दिवसांपूर्वी तिचे वडील तिला भेटण्याकरिता आले. त्यावेळी आपल्या मुलीला जावयाने कोंडून ठेवल्याचे पाहून ते गावाकडे परत गेले. मुलीचा होणार्या छळाचा धक्का बसून ते आजारी पडले.
शेवटी बुधवारी त्या नवविवाहितेची आई चंद्रपूरच्या दोन महिलांना सोबत घेऊन घुग्घुसमध्ये आली. त्यानंतर ग्रामपंचायत सदस्या ममता खैरे व सामाजिक महिला कार्यकर्त्या रेखा गेडाम यांच्यासह लॉयड मेटलच्या गेटवर गेल्या. याबाबत पोलिसांनाही पूर्वसूचना दिली. लॉयड मेटलमधून आरोपी भास्करला बोलाविले व मुलीला भेटण्याची विनंती केली. मात्र त्याने घरी येण्यास नकार दिला. पोलिसांना बोलविण्याची धमकी देताच महिलांना घेऊन तो घरी आला. नवविवाहितेची अवस्था पाहून सर्वच थक्क झाले. त्यांनी लगेच तिची सुटका केली. त्यानंतर घुग्घुस ठाणेदार मनीष ठाकरे यांनी प्रकरण गांभीर्याने घेऊन रात्री उशिरा तक्रार दाखल करून भादंवि ४९८, ३२३, ३२४ कलमान्वये गुन्हा दाखल केला. आरोपी भास्करला अटक केली. (वार्ताहर)