नागपूर : ताडोबा-अंधारी व्याघ्र प्रकल्पात जिप्सीमध्ये सहा पर्यटकांना परवानगी मिळाल्यानंतर आता पेंच व्याघ्र प्रकल्प आणि बोर व कऱ्हांडला या दोन अभयारण्यांतही पर्यटकांना जिप्सीतून सहा व्यक्तींना फिरण्यासाठी परवानगी दिली आहे. तसेच कँटरमध्ये बसणाऱ्या पर्यटकांच्या वाढीव संख्येतही परवानगी वाढविली आहे. येथील पर्यटन सुरू झाल्यापासूनही कोरोना संक्रमणाच्या कारणामुळे जिप्सीतून केवळ चार व्यक्तींनाच फिरण्याची परवानगी होती.
ताडोबा-अंधारी व्याघ्र प्रकल्पामध्ये काही दिवसांपूर्वीच स्थानिक प्रशासनाने सफारीत सहा पर्यटकांना जिप्सीतून फिरण्याची परवानगी दिली होती. त्यामुळे अन्य प्रकल्पांमधूनही ही मागणी पुढे येत होती. जिप्सीचालक आणि गाइड्सकडूनही या संदर्भात मागणी करण्यात आली होती. कोरोनामुळे व्यवसाय खालावल्याने आणि आता संक्रमणात बरीच घट झाल्याने ही बंदी हटविण्याची मागणी होत होती. या पार्श्वभूमीवर जिल्हाधिकारी रवींद्र ठाकरे यांनी हे आदेश काढले आहेत. जिल्हा आपत्ती व्यवस्थापन प्राधिकरणाचे अध्यक्ष या नात्याने ठाकरे यांनी नियम, अटींच्या अधीन राहून ही परवानगी दिली आहे. यानुसार पेंच व्याघ्र प्रकल्प आणि बोर व कऱ्हांडला या दोन अभयारण्यांत जिप्सीमध्ये चारऐवजी सहा पर्यटक पर्यटन करू शकतील. कँटर बसमधून पर्यटन करणाऱ्या पर्यटकांच्या संख्येतही वाढ केली आहे. २४ सीटर कँटरमध्ये २० पर्यटक आणि १८ सीटर कँटरमधून १५ पर्यटकांना परवानगी देण्यात आली आहे.
पेंच व्याघ्र प्रकल्पामध्ये ७ गेट असून दरररोज सकाळ-सायंकाळ १६९ जिप्सी पर्यटकांना सेवा देतात, तर कऱ्हांडलामध्ये चार गेटवरून सकाळ-सायंकाळ मिळून ९८ जिप्सी पर्यटकांच्या सेवेत असतात. बोर अभयारण्यातही पर्यटक मोठ्या संख्येने भेटी देत असतात.
...
पेंचकडे कल अधिक
ताडोबानंतर विदर्भातील पर्यटकांचा पेंच व्याघ्र प्रकल्पावर अधिक भर असतो. पेंचमध्ये ७ गेट असून सकाळ व सायंकाळ मिळून प्रत्येकी ८५ व ८४ अशा १६९ जिप्सी सेवा देतात. कोरोना संक्रमणाच्या नियमानंतर येथे चार पर्यटकांनाच एका जिप्सीतून पर्यटनाची परवानगी होती. या हिशेबाने ६७६ व्यक्ती रोज वनभ्रमंती करीत असत. क्षमता असूनही कोरोना संक्रमणाच्या नियमामुळे ३३८ वंचित राहायचे. या निर्णयामुळे पर्यटक सुखावले आहेत.
...