राजेंद्र कापगतेला सहा वर्षे कारावासाची शिक्षा

बंदुकीच्या गोळ्या झाडून सख्ख्या साळ्याची हत्या करणाऱ्या डॉ. राजेंद्र कापगतेला मुंबई उच्च न्यायालयाच्या नागपूर खंडपीठाने बुधवारी

हायकोर्ट : जन्मठेप रद्द, साळ्याची केली होती हत्या नागपूर : बंदुकीच्या गोळ्या झाडून सख्ख्या साळ्याची हत्या करणाऱ्या डॉ. राजेंद्र कापगतेला मुंबई उच्च न्यायालयाच्या नागपूर खंडपीठाने बुधवारी जन्मठेपेची शिक्षा रद्द करून ६ वर्षे कारावासाची शिक्षा सुनावली. न्यायमूर्तीद्वय भूषण गवई व इंदिरा जैन यांनी हा निर्णय दिला. या घटनेची त्यावेळी शहरात सर्वत्र चर्चा झाली होती. मृताचे नाव प्रशांत नाकाडे होते. ३१ डिसेंबर २०१४ रोजी नागपूर सत्र न्यायालयाने कापगतेला भादंविच्या कलम ३०२ (हत्या) अंतर्गत दोषी ठरवून जन्मठेपेची शिक्षा सुनावली होती. या निर्णयाविरुद्ध कापगतेने उच्च न्यायालयात अपील दाखल केले होते. उच्च न्यायालयाने प्रकरणातील विविध बाबी लक्षात घेता सत्र न्यायालयाच्या निर्णयात बदल करून कापगतेला भादंविच्या कलम ३०४-२ (सदोष मनुष्यवध) अंतर्गत वरीलप्रमाणे शिक्षा सुनावली. डॉ. कापगते साकोली येथे व्यवसाय करीत होता. त्याचे पत्नी नितासोबत पटत नव्हते. त्यामुळे निता माहेरी रहायला गेली होती. कापगते तिला परत येण्यास सांगत होता. १२ फेब्रुवारी २०११ रोजी महाकाळकर सभागृह येथे त्यांच्या नातेवाईकाचे लग्न होते. निता त्या लग्नाला गेली नव्हती. त्यामुळे कापगतेने निताचे काका भय्याजी व भाऊ मयत प्रशांतला याबाबत विचारणा केली. त्यावरून प्रशांत व कापगतेमध्ये कडाक्याचे भांडण झाले. दरम्यान, कापगतेने रागाच्या भरात स्वत:च्या बंदुकीतून प्रशांतवर दोन गोळ्या झाडल्या. परिणामी प्रशांत जागेवरच ठार झाला. कापगते गेल्या २०११ पासून कारागृहात आहे. कापगतेतर्फे वरिष्ठ वकील अविनाश गुप्ता व अ‍ॅड. आकाश गुप्ता, राज्य शासनातर्फे अतिरिक्त अभियोक्ता मयुरी देशमुख तर, मयताच्या कुटुंबातर्फे अ‍ॅड. समीर सोनवने यांनी बाजू मांडली.(प्रतिनिधी)