अखेर उमरेडच्या कोविड सेंटरला मिळाली जागा

उमरेड : दिवसागणिक वाढत जाणाऱ्या कोरोनाबाधितांच्या संख्येमुळे अनेकांच्या चिंतेत भर पडत आहे. अशातच दुसरीकडे उमरेड येथे कोविड सेंटरच नसल्याने बिकट समस्या निर्माण झाली होती. तालुक्यातील रुग्णांना भिवापूरच्या कोविड सेंटरमध्ये पाठविले जात होते. रुग्णांना होणारा त्रास आणि समस्या याबाबत सर्वप्रथम ‘लोकमत’ने वाचा फोडली. अखेरीस तालुका व्यवस्थापन समितीला कोविड सेंटरसाठी जागा मिळाली. उमरेड पालिकेच्या स्व. यशवंतराव चव्हाण सांस्कृतिक भवनात ही सुविधा करण्यात येणार असल्याची माहिती उमरेड पालिकेच्या प्रभारी मुख्याधिकारी सुवर्णा दखणे यांनी दिली. ‘लोकमत’ने ४ मार्च रोजीच्या अंकात ‘गंभीरच! उमरेडमध्ये कोविड सेंटरच नाही’ या शीर्षकाखाली वृत्त प्रकाशित करीत या समस्येकडे लक्ष वेधले होते. या वृत्ताची दखल आमदार राजू पारवे, नगराध्यक्षा विजयलक्ष्मी भदोरिया यांनी घेत यावर विचारविमर्श करीत निर्णय घेतला. अखेरीस स्व. यशवंतराव चव्हाण सांस्कृतिक भवन येथे कोविड सेंटर निश्चित करण्यात आले. येत्या काही दिवसात उपरोक्त सांस्कृतिक भवनात लवकरच कोविड सेंटर सुरू होणार आहे. यामुळे उमरेड तालुक्यातील रुग्णांना भिवापूरचा उलट प्रवास आणि त्रास टाळता येणार आहे. मागील काही वर्षांपासून धूळ खात पडलेल्या या सांस्कृतिक भवनाची युद्धस्तरावर स्वच्छता केली जात आहे. वीज, पाणी आणि अन्य सुविधांकडेही लक्ष दिले जात आहे. शिवाय अवतीभवतीचाही परिसर स्वच्छ करावा, अशी मागणी व्यक्त होत आहे.