नागपूर : गोधनी रेल्वेस्थानकावरील प्लॅटफार्ममध्ये भेग पडल्याचा प्रकार ‘लोकमत’ने उघडकीस आणला होता. परंतु त्याबाबत चौकशी करायचे सोडून रेल्वेच्या अधिकाऱ्यांनी चुप्पी साधली आहे.
गोधनी रेल्वेस्थानकाची आदर्श रेल्वेस्थानक म्हणून विकास करण्यासाठी निवड करण्यात आली आहे. गोधनी रेल्वेस्थानकाच्या प्लॅटफार्ममध्ये भेग पडल्याचे वृत्त ‘लोकमत’ने प्रकाशित केले होते. रेल्वे प्रशासनाने त्यावर तपास करण्याचे आदेशही दिलेले नाहीत. आदर्श स्टेशन म्हणून निवड करण्यात आलेल्या गोधनी रेल्वेस्थानकावरील कामे कुचकामी असल्याचे यावरून स्पष्ट झाले आहे. प्लॅटफार्म तयार करणाऱ्या कंपनीच्या प्रोप्रायटरने यास नियोजनाचा अभाव कारणीभूत असल्याचे म्हटले आहे. याबाबत तत्कालीन कनिष्ठ अधिकाऱ्याच्या निर्देशावर काम केल्याचे त्यांनी सांगितले. कंपनीच्या मते, पाईप चुकीच्या पद्धतीने टाकण्यात आला आहे. यावर आरसीसीचे काम व्हायला हवे होते नाही तर पाईप आत टाकावयाचे होते. परंतु या कामाची माहिती कनिष्ठ अधिकाऱ्यांना होती तर असे काम का करण्यात आले, हा प्रश्न आहे. याबाबत विभागीय रेल्वे व्यवस्थापक रिचा खरे यांच्याशी संपर्क साधण्याचा प्रयत्न केला असता, त्यांनी मोबाईल न उचलल्यामुळे संपर्क होऊ शकला नाही.
...........