महाडीबीटी पोर्टलद्वारेच योजनांचा लाभ

कळमेश्वर : कृषी विभागाच्या महाडीबीटी पोर्टलवर शेतकरी योजना या सदराखाली शेतकऱ्यांच्या सोयीकरिता सर्व योजनांचा लाभ आता एकच अर्जाने देण्यासाठी अर्ज करण्यापासून ते थेट लाभार्थ्याला प्रत्यक्ष लाभ मिळेपर्यंत एकात्मिक संगणकीय प्रणाली विकसित केली आहे. या प्रणालीद्वारे शेतकऱ्यांना त्यांच्या पसंतीनुसार विविध बाबी निवडीचे स्वातंत्र्य देण्यात आले आहे. शेतकऱ्यांनी शेतीशी निगडित विविध बाबीकरिता येथे अर्ज करावयाचा आहे. योजनेचा लाभ घेण्यासाठी शेतकऱ्यांनी आपला वैयक्तिक मोबाईल क्रमांक आधार कार्डशी संलग्न करणे आवश्यक असल्याचे तालुका कृषी अधिकारी उमाकांत हातांगळे यांनी सांगितले. महाडीबीटी पोर्टलच्या संकेतस्थळावरील शेतकरी योजना हा पर्याय निवडून शेतकरी स्वतःचा मोबाईल क्रमांक, संगणक सामुदायिक सेवा केंद्र, ग्रामपंचायत येथील सेवा केंद्र आदी माध्यमातून अर्ज करू शकणार आहे. यामध्ये वैयक्तिक लाभार्थी म्हणून नोंदणी करू इच्छिणाऱ्या सर्व शेतकऱ्यांना त्यांचा आधार क्रमांक संकेतस्थळावर प्रमाणित करून घ्यावा लागणार आहे. ज्या वापरकर्त्यांकडे त्याचा आधार क्रमांक नसेल त्यांनी प्रथम नोंदणी करावी. त्यानंतर महाडीबीटी पोर्टलमध्ये नमूद करून त्यांनी योजनांसाठी अर्ज करावा. अनुदान वितरित करण्यासाठी महाडीबीटी पोर्टलमध्ये त्यांना देण्यात येणारा आधार क्रमांक नोंदणीकृत करून प्रमाणित करावा. ज्या शेतकऱ्यांनी कृषिविषयक योजनांचा लाभ मिळविण्यासाठी अद्याप अर्ज केला नसेल त्यांनी ३१ डिसेंबरपर्यंत आपले अर्ज पोर्टलवर भरणे आवश्यक आहे.