सुपरची प्रदूषण मंडळाकडून पाहणी

सार्वजनिक आरोग्य जपणे व पर्यावरणाची हानी रोखण्यासाठी जैव वैद्यकीय कचरा (बायो-मेडिकल वेस्ट) हाताळणीची कठोर नियमावली असताना मेडिकलशी संलग्न असलेल्या सुपर स्पेशालिटी रुग्णालयातील

मेडिकल प्रशासनाकडून चौकशीचे आदेशनागपूर : सार्वजनिक आरोग्य जपणे व पर्यावरणाची हानी रोखण्यासाठी जैव वैद्यकीय कचरा (बायो-मेडिकल वेस्ट) हाताळणीची कठोर नियमावली असताना मेडिकलशी संलग्न असलेल्या सुपर स्पेशालिटी रुग्णालयातील जैव कचरा भंगारात विकण्याच्या उद्देशाने तो साठवून ठेवण्यात आल्याचे वास्तव ‘लोकमत’ने सोमवारी प्रसिद्ध करताच खळबळ उडाली. महाराष्ट्र प्रदूषण मंडळाने याची पाहणी करून त्याचा अहवाल पाठविण्याचे तर मेडिकल प्रशासनाने या प्रकरणाची चौकशी करण्याचे आदेश दिले आहेत.मेयो, मेडिकल व सुपर स्पेशालिटी रुग्णालयातील रुग्णाच्या संपर्कात आणि उपचार करताना वापरलेल्या विशेषत: आयव्ही बॉटल्स, इंजेक्शन्स, सिरींज, रबळी नळ्या, ग्लोव्हज, औषधांचे रिकामे डबे आदी बायो मेडिकल वेस्टला भंगार व्यावसायिकांकडून चांगली किंमत मिळते. पैशाच्या हव्यासापायी काही कर्मचारी या वस्तू गोळा करून नंतर त्या भंगारात विकतात. या संदर्भातील वृत्त लोकमतने १३ जानेवारीच्या अंकात ‘सुपरच्या आत बायो मेडिकल वेस्टचा ढीग’ या मथळ्याखाली प्रसिद्ध केले. याची दखल महाराष्ट्र प्रदूषण मंडळ-१ ने घेतली. या मंडळाच्या उपप्रादेशिक अधिकारी हेमा देशपांडे यांनी सुपरला भेट देऊन छाती रोग वॉर्डाच्या बाजूलाच असलेला जैव कचऱ्याचा ढीग पाहून आश्चर्य व्यक्त केले. त्यांनी सुपरच्या संबंधित अधिकाऱ्यांना या घातक कचऱ्याची तत्काळ विल्हेवाट लावण्याच्या सूचना दिल्या. सुपर स्पेशालिटी हॉस्पिटलमध्ये विशेष कार्य अधिकारी म्हणून नुकतेच पदभार सांभाळलेले डॉ. मनीष श्रीगिरीवार यांनीही याची गंभीर दखल घेतली. त्यांनी या संदर्भातील चौकशीचे आदेश दिले आहेत. वृत्तामुळे आज अनेक भंगार व्यावसायिकांनी बायो मेडिकल वेस्ट लपवून ठेवला होता, तर काहींनी आपली दुकाने बंद ठेवल्याचे दिसून आले. (प्रतिनिधी)