‘सनातन’ची सीआयडी चौकशी

‘सनातन’ने जन्मदात्यांपासून मुलगी हिरावल्याचे वृत्त ‘लोकमत’ने प्रसिद्ध केल्यानंतर येथील सनातनचे शहर, तालुक्यातील साधक

बारामती : ‘सनातन’ने जन्मदात्यांपासून मुलगी हिरावल्याचे वृत्त ‘लोकमत’ने प्रसिद्ध केल्यानंतर येथील सनातनचे शहर, तालुक्यातील साधक व केंद्रप्रमुख आता पोलिसांच्या रडारवर आले आहेत. शहर पोलीस व सीआयडीने प्रकरणाची चौकशी सुरू केली आहे. पोलीस सूत्रांनी दिलेल्या माहितीनुसार, ‘सनातन’च्या बारामतीतील केंद्रप्रमुखाचा मोबाइल शुक्रवारी सकाळपासून संपर्क क्षेत्राच्या बाहेर होता. २०११मध्ये बारामती शहर पोलिसांनी सनातनच्या आश्रमातील शीतल बेपत्ता असल्याची तक्रार घेणे आवश्यक होते. त्या वेळी ती सज्ञान आहे, त्यामुळे प्रकरणात हस्तक्षेप करणार नाही, असे सांगून पोलिसांनी आम्हाला घरी पाठवले होते, याचा पुनरुच्चार शुक्रवारी शीतलच्या आईने पोलिसांसमोर केला. मोक्ष साधनेसाठी मुलीला आमच्यापासून दूर नेऊन त्यांनी काय साधले, असा प्रश्नही त्यांनी विचारला आहे. शीतल सध्या पनवेल येथील आश्रमात असल्याची माहिती त्यांनी पोलिसांना दिली. या पार्श्वभूमीवर सीआयडीने स्वतंत्र चौकशी सुरू केली आहे. सनातनचा केंद्रप्रमुख बारामती एमआयडीसीतील खासगी कंपनीत नोकरी करतोे. त्याच्या भिगवण रोड येथील दूध संघ वसाहतीजवळ असलेल्या फ्लॅटमधून सनातनचे कामकाज चालते, अशी माहिती पोलिसांना मिळाली आहे. केंद्र प्रमुखाचा मोबाइल क्रमांक मिळवून त्याच्याशी पोलिसांनी संपर्क साधला; मात्र दिवसभर तो ‘नॉट रिचेबल’ होता. बारामती शहर व परिसरातील मंदिरे, धार्मिक स्थळांमध्ये सनातनचे कामकाज चालते. त्यानुसार माहिती काढण्यास सुरुवात केली आहे. संस्थेचे स्थानिक व बाहेरचे किती साधक आहेत, याचीही माहिती घेतली जात असल्याचे पोलीस सूत्रांनी सांगितले.‘लोकमत’च्या बातमीमुळे पोलीस यंत्रणा शीतलच्या शोधासाठी कामाला लागली आहे, अशी प्रतिक्रिया स्थानिकांमधून व्यक्त होत आहे. सनातनच्या आश्रमात शीतलला ४ वर्षांपूर्वी नेण्यात आले होते. दोन दिवसांपासून प्रसारमाध्यमांनी हा प्रकार उघड केल्यानंतर प्रचंड तणावात असलेल्या शीतलच्या आई-वडिलांना दिलासा मिळाला आहे. मात्र, ते घाबरलेले आहेत. त्यांना पोलीस संरक्षण देण्यात येणार असल्याची माहिती शहर पोलिसांनी दिली. (प्रतिनिधी)