खंडाळ्यात जुन्या वैमनस्यातून दोन गटात हिंसक हाणामारी झाल्याची घटना घडली. या घटनेत एका व्यक्तीचा मृत्यू झाला आहे. तर, दोन जण जखमी झाले. जखमींवर वैजापूर येथील उपजिल्हा रुग्णालयात दाखल करण्यात आले. या घटनेनंतर खंडाळा गाव आणि वैजापूर शहरात तणाव वाढल्याचे पाहायला मिळाले. सुव्यवस्था राखण्यासाठी परिसरात मोठा पोलीस बंदोबस्त तैनात करण्यात आला आहे.
मोईन मुख्तार शाह (वय, २४), असे मृत्यू झालेल्या तरुणाचे नाव आहे. तर, शेख अब्रार आरिफ शेख (वय २३) आणि शोएब असीम पठाण (वय २३) यांना गंभीर दुखापत झाली. त्यांना उपचारासाठी वैजापूर येथील उपजिल्हा रुग्णालयात दाखल करण्यात आले. या घटनेमागील नेमके कारण समजू शकले नाही. परंतु, जुन्या वैमनस्यातून दोन गटात हिंसक हाणामारी झाली, असे सांगितले जात आहे.
गौरव राजू अनर्थ (रा. भाऊगाव), अक्षय सुरेश पवार, शेखर लक्ष्मण नन्नावरे आणि नंदू पोपट जानराव (सर्व रहिवासी खंडाळा) यांच्यासह सात जणांविरुद्ध गुन्हा दाखल करण्यात आला आहे. तक्रारीनुसार, गौरव आणि त्याच्या साथीदारांनी मोईन, अबरार आणि शोएबवर चाकू हल्ला केल्याचा आरोप आहे. वैजापूर पोलीस ठाण्याचे पोलीस अधीक्षक विनयकुमार राठोड यांनी रात्री गावाला भेट दिली.
आरोपींना अटक करण्याची मागणी करत मृत मोईन मुख्तार शाह यांचे कुटुंबीय उपजिल्हा रुग्णालयात मोठ्या संख्येने जमले. कारवाई होईपर्यंत त्यांनी मृतदेह स्वीकारण्यास नकार दिला. कुटुंबाच्या आक्रमक भूमिकेमुळे रुग्णालय परिसरात तणावपूर्ण वातावरण आहे. शुक्रवारी पहाटे २:०० वाजता सात जणांविरुद्ध गुन्हा दाखल करण्यात आला. पोलिसांनी दोन आरोपींना ताब्यात घेतले. याप्रकरणी पोलीस तपास सुरू आहे.