निद्रिस्त ‘खाकी’ अन भयभीत अकोलेकर!

पोलिस ‘टाइट’, परिस्थिती वाईट

अकोला: शहरात गावगुंड, खंडणी बहाद्दर, चोर, घरफोडे, लुटारूंनी हैदोस घातला असताना, नागरिकांच्या संरक्षणाची जबाबदारी असलेले पोलिस कितपत जागरुक असतात, याचा आढावा घेण्याचा प्रयत्न 'लोकमत' चमूने शनिवारी आणि रविवारी रात्रभर फिरून केला असता अत्यंत भीषण अन् धक्कादायक वास्तव समोर आले. बहुतांश पोलिस कर्मचारी ड्युटीच्या वेळेत झोपा काढत असल्याचे, यावेळी निदर्शनास आले. सरकार या कर्मचार्‍यांना झोपा काढण्याचा पगार देते की काय, असा प्रश्न यानिमित्ताने उपस्थित होत आहे. सामान्य नागरिक ज्यांच्या भरवश्यावर रात्रीची झोप निर्धास्तपणे घेतात, ती पोलिस यंत्रणा रात्रभर किती सतर्क असते, हे जाणून घेण्यासाठी लोकमत चमूने शनिवारी आणि रविवारी मध्यरात्री १ वाजतापासून पहाटे ५ वाजेपर्यंत शहरातील जुने शहर, सिटी कोतवाली, रामदास पेठ, खदान, सिव्हिल लाईन्स आणि आकोट फैल पोलिस ठाण्याच्या हद्दीत फेरफटका मारला. या पाहणीच्या वेळी सामान्य नागरिकांप्रमाणेच पोलिसही झोपलेलेच आढळून आले. शहरातील बहुतांश पोलिस चौक्या बंद असल्याचे यावेळी आढळून आले. वास्तविक, पोलिस यंत्रणा २४ तास, त्यातही रात्रीच्यावेळी जास्त सतर्क असणे, अपेक्षित असते. प्रत्यक्षात मात्र पोलिस ना पोलिस चौक्यांमध्ये दिसले, ना रस्त्यांवर. पोलिस यंत्रणेचा कारभार आणि दिवसागणिक ढासळत असलेली अकोल्याची कायदा व सुव्यवस्था परिस्थिती पाहीली तर, अकोला पोलिस दलात 'शुद्धीकरण मोहीम' राबविणे अत्यावश्यक आहे, यावर यानिमित्ताने पुन्हा एकदा शिक्कामोर्तब झाले.