‘ड्रोन’ डिलेव्हरीची चौकशी

हवाई डिलेव्हरीद्वारे आॅर्डर केल्यापासून दहा मिनिटांच्या आत पिझ्झा तुमच्या हाती, हे फ्रान्सिस्को पीझेरियाने मुंबईकरांना दाखवलेले

मुंबई : हवाई डिलेव्हरीद्वारे आॅर्डर केल्यापासून दहा मिनिटांच्या आत पिझ्झा तुमच्या हाती, हे फ्रान्सिस्को पीझेरियाने मुंबईकरांना दाखवलेले स्वप्न प्रत्यक्षात पूर्णपणे उतरणे मुंबई पोलिसांच्या भूमिकेवर अवलंबून आहे. तूर्त कंपनीच्या चाचणीची मुंबई पोलिसांनी चौकशी सुरू केली आहे. ‘ड्रोन’ या रिमोटवर चालणार्‍या हवाई यंत्राद्वारे फ्रान्सिस्को कंपनीने ११ मे रोजी पिझ्झा डिलेव्हरीची चाचणी घेतली. लोअर परळ येथून वरळीच्या गगनचुंबी इमारतीत अवघ्या दहा मिनिटांत पिझ्झा पोहोचवला. कंपनीच्या या चाचणीबाबतचे वृत्त प्रसिद्ध होताच मुंबई पोलिसांच्या भुवया उंचावल्या. तोवर मात्र अशा चाचणीची पुसटशी कल्पनाही पोलिसांना नव्हती. मात्र या चाचणीची माहिती मिळताच पोलिसांनी तत्काळ चौकशी सुरू केली. सूत्रांकडून मिळालेल्या माहितीनुसार, फ्रान्सिस्को कंपनीने चाचणीआधी मुंबई पोलिसांची परवानगी घेतलेली नव्हती. रिमोट कंट्रोलच्या साहाय्याने मुंबईच्या आकाशात उडणारी कोणतीही वस्तू, यंत्र, विमानांबद्दल आम्ही (मुंबई पोलीस) खूप गंभीर आहोत. चाचणीघेण्याआधी पोलीस परवानगी का घेतली नाही किंवा चाचणीबद्दल माहिती का दिली नाही, याचा जाब कंपनीला विचारला जाईल. हवाई वाहतूक कक्षाशी कंपनीने चाचणीची परवानगी घेतली का, याची माहिती मागवली आहे. त्यानंतर कारवाईचा निर्णय घेतला जाईल, अशी प्रतिक्रिया मध्य प्रादेशिक विभागाचे अप्पर आयुक्त मधुकर पांडे यांनी दिली. मुंबईवरील दहशतवादी हल्ल्याचे सावट लक्षात घेता ग्राहकांपर्यंत पिझ्झा पोहोचविण्यास ड्रोन यंत्रणा पर्याय धोकादायक ठरेल, असे मत पोलीस दलातील वरिष्ठ अधिकारी व्यक्त करतात. वाहतूककोंडीमुळे पिझ्झाची डिलेव्हरी उशिराने होते. त्यावर उपाय म्हणून ड्रोनद्वारे पिझ्झाची हवाई डिलेव्हरी उतारा ठरू शकतो, असे मत कंपनीचे मुख्य कार्यकारी अधिकारी मिखेल रजनी यांनी व्यक्त केले.