इतिहास लेखनात केवळ उदो उदो नको; ‘चुका ’ ही मांडल्या जायला हव्यात : डॉ. गो.बं देगलुरकर

मूर्तिशास्त्र अभ्यासक आणि मंदिरस्थापत्य तज्ञ डॉ. गो.बं देगलूरकर यांना पुरातत्व क्षेत्रातील अतुलनीय योगदानाबददल ‘पुण्यभूषण’ पुरस्कार जाहीर झाला आहे. त्यानिमित्त त्यांच्याशी साधलेला हा संवाद.

- नम्रता फडणीस - * पुण्यभूषण पुरस्कार जाहीर झाला.काय वाटतं?_- एवढा मोठा मानाचा पुरस्कार मिळाला, त्याबददल आनंद तर आहेच. विविध क्षेत्रातील इतक्या मोठ्या मंडळींना हा पुरस्कार दिला आहे त्यांच्या पंक्तीत मला बसायला मिळाले हे माझे भाग्यसमजतो. * पुण्याशी ॠणानुबंध कसे जुळले? - माझे मँट्रिकपर्यंतचे शिक्षण पंढरपूरमध्ये झाले.  घरातील वडिलधा-या व्यक्तींनी सांगितले की पंढरपूर सोडायचे ठरवले आहे तर पुण्याला जा. तिथे चांगले शिक्षण मिळते. पुण्याच्या स.प महाविद्यालयात प्रवेश घेतला. आम्ही सगळे भाऊ स.प.मध्येच शिकलो.  इतिहास विषय घेऊन पदवी संपादन केली. त्यानंतर हैद्राबादच्या उस्मानिया विद्यापीठातून एम.ए पूर्ण केले. पुन्हा पी.एच.डी साठी डेक्कन कॉलेजमध्ये आलो. * पुण्यात पदवी आणि पी.एचडी चे शिक्षण पूर्ण झाले, मग प्रबंधाचा विषय मराठवाडा संस्कृतीचा इतिहास हा का निवडासा वाटला? -त्याचे कारण म्हणजे मी मूळचा मराठवाड्याचा उर्वरित महाराष्ट्राचा असा समज आहे की मराठवाडा हा मागासलेला आहे. मग मागासलेला असेल तर हा प्रारंभापासून आहे का? ते पुढे आणावे म्हणून हा विषय घेतला. गुरू म्हणाले, तुमच्या अभ्यासाने सिद्ध झाले की तो मागासलेला आहे तर तुम्ही ते लिहाल का? मी हो म्हटले आणि हा विषय निवडला. * मूर्तिशास्त्र हा विषय अभ्यासासाठी घेण्यामागे कोणता विचार होता? - पुरात्वाचेच मंदिर स्थापत्य, मूर्तीशास्त्र तसेच शिलालेख आणि नाणकशास्त्र हे भाग आहेत. भारतीय संस्कृतीचे व्यवच्छेदक लक्षण हे मंदिरे आणि मूर्ती आहेत. मूर्ती कशाकरिता निर्माण झाल्या? मूर्तिपूजा ही ग्रीस, इटली मध्ये अस्तिवात होती. त्यांच्या संस्कृतीचे संदर्भ बदलत गेले आणि मूर्तिपूजा मागे पडली. भारतात मूर्तिपूजा जा आजही होते, त्याला इतके महत्व का आहे? हे जाणून घ्यावेसे वाटले. एखाद्या समाजाला गुणांची गरज असते तेव्हा त्या गुणांचे समूर्तकरण करणे म्हणजे मूतीर्पूजा असते. समाज प्रबोधन आणि समाजाचे अभिसरण यासाठी मूर्तिपूजा आवश्यक असते. * मूतीर्पूजेबददल समाजात जी मिथ्थ्यक आहेत, जी धारणा आहे, त्याबददल काय वाटते? अमुक एका मंदिरात महिलांना प्रवेश निषिद्ध आहे, असे म्हटले जाते? त्यामागची नक्की सत्यता काय आहे?- मूर्तीबद्दल समाजात खूप मोठे गैरसमज आहेत. ३३ कोटी देव असे म्हटले जाते तेव्हा ते ३३ प्रकारचे देव आहेत. नृत्य गणपतीची मूर्ती बसवली की तो नाचवतो म्हणतात मग ती बसवली तर? तो बसवतो का? असे विचारले तर उत्तर कोणाकडेच नसते. देव भक्तांचं भल करणारा असेल तर तो वाईट करेल का? शास्त्राच्या दृष्टीने या समजाला कोणताही आधार नाही. समाजात ज्या गोष्टी दृढ होतात त्या अपसमजामुळे झालेल्या असतात.  स्वार्थ लोपता हे त्यामागचे कारण आहे. प्राचीन काळात कुठलीच अशी बंधनं नव्हती. ॠग्वेदात विद्वान स्त्रिया पाहातो त्या पुरूष विद्वानांशी वाद घालून जिंकू शकतात मग त्यांनाच प्रवेश नाकारणे हे हास्यास्पद वाटते. * काळानुरूप इतिहासाचे संदर्भ बदलत जातात, त्यामुळे इतिहासाचे पुर्नलेखन होणे आवश्यक आहे का? सध्याची स्थिती काय आहे?- आतापर्यंत जो इतिहास लिहिला तो परक्यांनी लिहिला. ज्या लोकांना राज्य करायचे आहे ते इतिहासांच्या साधनाद्वारे त्यांना अनुकूल होईल अशी घडण ते इतिहासाला देत असतात. आपण इतिहास केवळ महाराष्ट्रापुरता मर्यादित ठेवतो, त्यामुळे इतर प्रांतापर्यंत आपल्या लोकांचे काम पोहोचत नाही. तिचं साधन असतात केवळ दृष्टीकोन बदलला पाहिजे. भारतीयांच्या दृष्टीकोनातून इतिहास लिहिला गेला पाहिजे.* इतिहासकार त्यांच्या सोयीने इतिहास लिहितात अशी एक टिका केली जाते? त्याबददल काय वाटते?- एखाद्याने इतिहास त्रोटक साधन किंवा दृष्टीकोनातून लिहिला आहे असे जर  कुणाला वाटले तर अन्य साधनांद्वारे तो पूर्ण करता आला पाहिजे. इतिहास लिहिणा-याचा दृष्टीकोन हा तसा म्हटल तर  पक्षपाती असतो. मात्र, देशाला उपयुक्त ठरेल असा सर्वमान्य इतिहास लिहिला गेला पाहिजे. आपल्या काही चुका झाल्या असतील तर त्याही लिहायला हव्यात. इतिहास हा पुढच्या पिढीला मार्गदर्शक ठरणारा असतो. चुकीच्या गोष्टीही समोर आल्या पाहिजेत. * प्राचीन संस्कृतीमधील अशा कोणत्या गोष्टी आहेत ज्या अद्यापही समोर आलेल्या नाहीत? - महाराष्ट्राचा इतिहास ताम्रपाषाण, पुराश्म आणि नवाश्मयुगापर्यंत पोहोचला आहे. अजूनकाही ठिकाणी उत्खनन झाली तर महाराष्ट्राची संस्कृती किती समृद्ध होती हे समोर येईल. राज्यात कितीतरी मंदिरे आहेत त्यांचा अभ्यास व्हायला पाहिजे. मला  टागोर नँशनल फेलोशीप मिळाली आहे त्यासाठी हिस्ट्रोरिकल रिलिजिअस कल्टवाईज स्टडी महाराष्ट्र बेस्ड आॅन अनकॉमन युनिक इमेजेस हा विषय अभ्यासासाठी निवडला आहे. प्राचीन काळातील देवळांचा अभ्यास देखील झालेला नाही. तो व्हायला हवा. त्यातून ज्या उणिवा राहिल्या आहेत त्या दूर होतील. ------------------------------------------------------------