मुलं पतीसारखी दिसेनात, DNA चाचणी केली, तरी विश्वास बसेना, पुण्यात महिलेसोबत धक्कादायक प्रकार  

Pune Crime News: पती-पत्नीमधील नात्यामध्ये संशय निर्माण होऊन त्यामधून संसारात वाद होण्याचे प्रमाण हल्ली खूप वाढले आहे. अशाच संशयामधून नाशिकमधील एका विवाहित महिलेसोबत पुण्यात घडलेला धक्कादायक प्रकार समोर आला आहे.

पती-पत्नीमधील नात्यामध्ये संशय निर्माण होऊन त्यामधून संसारात वाद होण्याचे प्रमाण हल्ली खूप वाढले आहे. अशाच संशयामधून नाशिकमधील एका विवाहित महिलेसोबत पुण्यात घडलेला धक्कादायक प्रकार समोर आला आहे. या महिलेच्या मुलांचे चेहरे तिच्या पतीसारखे दिसत नाहीत, असा आरोप करत तिच्या सासरच्या मंडळींनी छळ केला. एवढंच नाही तर तिच्या मुलांची डीएनए चाचणीही करवून घेतली. मात्र डीएनए चाचणीत ही मुलं तिच्या पतीचीच असल्याचं निष्पन्न झालं. पण त्यानंतरही त्यांनी तिच्यावर विश्वास न ठेवता तिला मुलांसह घराबाहेर काढलं. या प्रकरणी पीडित महिलेने पोलीस ठाण्यात धाव घेत तक्रार दिली आहे. आता या प्रकरणी पोलिसांनी तपास सुरू केला आहे.

याबाबत मिळालेल्या माहितीनुसार या प्रकरणातील पती आणि पत्नी हे सुशिक्षित आहेत. तसेच पती पुण्यामधील एका प्रसिद्ध खाजगी कंपनीमध्ये कामाला आहे. लग्नानंतर हे कुटुंब पुण्यामध्येच स्थायिक झालं होतं. तसेच त्यांना एक मुलगी आणि एक मुलगा आहे. मात्र या जोडप्याच्या मुलांचे चेहरे पतीशी मिळते जुळते नसल्याचा दावा करत सासरच्या मंडळींनी सुनेवर संशय घेण्यास सुरुवात केली.

या प्रकरणातील पीडित महिलेच्या नणंदेने ही मुलं आपल्या भावासारखी दिसत नसल्याचा दावा केला. पुढे सासू-सासऱ्यांनीही सुनेवर आळ घेण्यास सुरुवात केली एवढंच नाही तर एकेदिवशी ही महिला बाहेर गेली असताना सासू सासरे घराला कुलूप लावून गावी निघून गेले. त्यानंतर महिलेने पतीला फोन लावला असता त्यानेही तिच्या मुलं आपल्यासारखी दिसत नसल्याचे सांगून तिच्या चारित्र्यावर संशय घेतला.

त्यानंतर या महिलेने स्वत:च्या चारित्र्याची पडताळणी करण्यासाठी डीएनए चाचणी करण्याची तयारी दर्शवली. त्यानंतर काही कुटुंबीयांच्या उपस्थितीत सदर महिलेची मुले आणि पतीची डीएनए चाचणी करण्यात आली. या डीएनए चाचणीमधून सदर महिलेची मुले ही तिच्या पतीपासूनच झालेली असल्याचे सिद्ध झाले. मात्र चारित्र्याच्या परीक्षेत पास झाल्यानंतरही पतीने आणि सासरच्या मंडळींनी या महिलेला आणि तिच्या मुलांना स्वीकारण्यास नकार दिला. त्यामुळे संतापलेल्या महिलेने थेट पोलीस ठाण्यात धाव घेत पती आणि सासरच्या मंडळींविरोधात तक्रार दिली. त्यानंतर पोलिसांना विविध कलमांखाली गुन्हा दाखल करत तपास सुरू केला आहे.