CM Devendra Fadnavis: महाराष्ट्र राज्य माध्यमिक व उच्च माध्यमिक शिक्षण मंडळामार्फत घेण्यात येणाऱ्या परीक्षा कॉपीमुक्त करण्यासाठी मुख्यमंत्री देवेंद्र फडणवीस यांनी महत्त्वाचे पाऊल उचललं आहे. १२ वी आणि १०वी च्या परीक्षेदरम्यान कॉपी रोखण्यासाठी राज्यभर कॉपीमुक्त अभियान कठोरपणे राबवण्याचे आदेश देण्यात आले होते. त्यानंतर आता परीक्षेत कॉपीसाठी मदत करणाऱ्या शिक्षकांवर कारवाई करण्याचे आदेश मुख्यमंत्री देवेंद्र फडणवीस यांनी दिले आहेत.
राज्यातील दहावी व बारावीच्या परीक्षांमध्ये सामूहिक कॉपीच्या घटनांवर कडक कारवाई करण्याचे आदेश मुख्यमंत्री देवेंद्र फडणवीस यांनी राज्यातील सर्व जिल्हाधिकारी, पोलीस अधिकारी यांना दिले आहेत. अशा केंद्रांची मान्यता कायमस्वरूपी रद्द करावी तसेच कॉपीस मदत करणाऱ्या शिक्षक आणि कर्मचाऱ्यांना थेट सेवेतून बडतर्फ करण्याचे निर्देश मुख्यमंत्री देवेंद्र फडणवीस यांनी राज्य मंत्रिमंडळाच्या बैठकीत दिले आहेत. यावेळी परीक्षेच्या पारदर्शकतेसाठी कडक उपाययोजना करण्यासही सांगण्यात आलं आहे.
मुख्यमंत्र्यांच्या सूचना
परीक्षा केंद्रांच्या १०० मीटर परिसरात अनधिकृत व्यक्तींना प्रवेशबंदी तसेच पुरेसा बंदोबस्त ठेवावा
विद्यार्थ्यांना कोणतेही कॉपी साहित्य (पुस्तके, नोटस्, मोबाईल इ.) जवळ बाळगण्यास मनाई
भरारी पथकाद्वारे कडक निरीक्षण करण्यात यावे
संवेदनशील केंद्रांवर ड्रोन व व्हिडिओ कॅमेऱ्यांद्वारे नजर ठेवावी
जिल्हाधिकाऱ्यांनी परीक्षा केंद्रावर विशेष बैठ्या पथकाची नियुक्ती करावी
प्रत्येक तालुक्यात विशेष प्रमुख, उपजिल्हाधिकारी यांची नियुक्ती करावी