देवणी तालुक्यातील एकूण ४५ ग्रामपंचायतीच्या सरपंच पदाच्या आरक्षणात २३ महिला सरपंचपदी विराजमान होणार आहेत. अनुसुचित जाती पुरुष ४, अनुसूचित जाती महिला ५, अनुसूचित जमाती १, अनुसूचित जमाती महिला १, नामाप्र पुरुष ६ तर नामाप्र महिला ६ तर सर्वसाधारण महिला ११, सर्वसाधारण पुरुष ११ पदाचे आरक्षण काढण्यात आले.
तालुक्यातील आरक्षणनिहाय सरपंच पदाची गावे पुढीलप्रमाणे, अनुसूचित जाती - देवणी (खु.), सावरगाव, माणकी, कोनाळी, तर अनुसूचित जाती महिलासाठी हंचनाळ, बटनपूर, टाकळी, गुरनाळ, विळेगाव ही गावे आरक्षित झाली आहेत.
अनुसूचित जमाती पुरुष आंबेगाव तर महिलांसाठी कमालवाडी ही गावे आरक्षित झाली आहेत. नागरिकांच्या इतर मागास प्रवर्ग पुरुषसाठी नागराळ, दवणहिप्परगा, दरेवाडी, लासोना, भोपनी, सय्यदपूर तर नामाप्रवर्ग महिलासाठी नागतीर्थवाडी, बोळेगाव, धनेगाव, वागदरी, नेकनाळ, कमरोद्दीनपूर ही गावे आरक्षित झाली आहेत.
सर्वसाधारण महिलासाठी डोंगरेवाडी, आनंदवाडी, अनंतवाडी, वलांडी, हेळंब, आचवला, चवणहिप्परगा, अंबानगर, वडमुरंबी, हिसामनगर, इंद्राळ या गावात महिलाचा कारभार राहणार आहे. तर सर्वसाधारण जागेसाठी संगम, अजनी, कवठाळा, सिंधिकामट, गुरधाळ, गौंडगाव, होनाळी, तळेगाव (भो.), बोरोळ, जवळगा, बोंबळी (खु.) या गावाचे सरपंचपद खुले राहिले आहे. सोमवारी झालेल्या आरक्षण सोडतीस उपविभागीय अधिकारी सदाशिव पडदुने, तहसीलदार सुरेश घोळवे, नायब तहसीलदार इसामोद्दीन शेख, गटविकास अधिकारी मनोज राऊत, पोनि सी.एस. कामटेवाड यांच्यासह तालुक्यातील पदाधिकारी उपस्थित होते.
आरक्षण सोडतप्रसंगी तहसील कार्यालयाचे कर्मचारी सुग्रीव बिरादार, प्रवीण कांबळे, दत्ता कासले, शिवराज चिदरे, तुळशीदास अनंतवाल, व्यंकट बिजापुरे यांनी परिश्रम घेतले.
बहुमताच्या आकड्यांचा खेळ रंगणार...
निवडणुकीनंतर पुन्हा आरक्षण सोडतीची प्रक्रिया राबविण्यात आली. यावेळीच्या आरक्षण सोडतीत बदल होईल असे मनसुबे अनेकांनी बांधले होते. मात्र, केवळ चार गावाच्या आरक्षणात बदल झाला आहे. उर्वरित ४१ ग्रामपंचायत सरपंचपदाचे आरक्षण कायम राहिल्याने अनेकांचे मनसुबे उधळल्याचे चित्र आहे. नुकत्याच झालेल्या ३४ ग्रामपंचायतीच्या सरपंचपदाच्या निवडी २ ते १२ फेब्रुवारी या कालावधीत होणार आहे. तालुक्यातील काही गावात बहुमत एका गटाला तर सरपंचाचे उमेदवार दुसऱ्या गटाकडे असल्याने बहुमतवाल्या गटांना उपसरपंच पदावर समाधान मानावे लागणार आहे. आंबेगाव येथील सरपंच पद एसटी वर्गासाठी जाहीर झाले असून, तेथे या वर्गासाठी सदस्य पदासाठी जागा न ठेवल्याने तेथील सरपंच पद हे तूर्त रिक्त राहणार आहे. डोंगरेवाडी येथील सात सदस्य ग्रामपंचायतीसाठी फक्त एक सदस्याची निवडणूक झाल्याने तेथेही ग्रामपंचायत अस्तित्वात येण्यासाठी कायदेशीर अडचणी आल्या आहेत.