निलंगा : तालुक्यातील येळनूर येथील तेरणा नदीवरील पुलाची अवस्था अतिशय जीर्ण झाली असून, तो ढासळण्याची भीती निर्माण झाली आहे. दरम्यान, सहा महिन्यांपूर्वी जिल्हाधिकाऱ्यांसह संबंधित अधिकाऱ्यांनी पुलाची पाहणी केली होती. मात्र, अद्यापही दुरुस्तीसंदर्भात कुठलीही हालचाल झाली नाही. त्यामुळे गुंजरगा, येळणूर, चांदोरी, बोरसुरीच्या ग्रामस्थांतून संताप व्यक्त होत आहे.
तालुक्यातील येळनूर येथून वाहणाऱ्या तेरणा नदीवरून ये-जा करण्यासाठी १९७६ मध्ये शंभर मीटर लांबीचा दगडी पूल तयार करण्यात आला होता. त्यानंतर मात्र पुलाची कसलीही डागडुजी करण्यात आली नसल्याने हा पूल अतिशय जीर्ण झाला आहे. गावालगतच्या या पुलावरून सतत वाहतूक होत असते. उच्चस्तरीय बॅरेजेसलगत हा पूल असल्यामुळे पाण्याचा प्रवाहाचा नेहमीच पुलाला फटका बसतो. त्यामुळे हा पूल मजबूत होणे गरजेचे आहे.
यासंदर्भात गावच्या सरपंच सोनाबाई परमेश्वर सोळुंके यांनी जिल्हा परिषदेकडे डागडुजीची मागणी केली असता येथील शाखा अभियंता गंगथडे व कनिष्ठ अभियंता यू.जी. चव्हाण यांनी १७ जुलै २०२० रोजी पुलाची पाहणी करून सदरील पुलाची डागडुजी करणे आवश्यक असल्याचा अहवाल वरिष्ठांकडे सादर केला होता. तसेच ऑक्टोबर २०१९ मध्ये तत्कालीन मुख्यमंत्री देवेंद्र फडणवीस यांचे स्वीय सहाय्यक तथा औसा मतदारसंघाचे विद्यमान आ. अभिमन्यू पवार यांच्या पत्रान्वये सदरील पुलाची डागडुजी करण्यासाठी लातूर पाटबंधारे विभाग क्र. १ यांनी जिल्हा नियोजन अधिकाऱ्यांना पत्रान्वये सदरील डागडुजी करणे आवश्यक असल्याचे कळविले होते. या पुलाची दयनीय अवस्था झाली असून, स्लॅब कोसळण्याची भीती व्यक्त होत आहे. पुलाच्या खालच्या बाजूच्या सळया उघड्या पडल्या आहेत. पुलाच्या वर मोठमोठे खड्डे पडले आहेत. त्यामुळे डागडुजी कधी होणार, असा सवाल येळनूरचे ग्रामस्थ अजित सोळुंके यांनी केला आहे.
संबंधित विभागाच्या अधिकाऱ्यांनी पुलाची काही वर्षांपूर्वी पाहणी केली. मात्र, त्यावर अद्याप कसलीच कार्यवाही झाली नाही. यासंदर्भात लोकमतमध्ये वृत्त प्रकाशित झाल्यानंतर जिल्हाधिकारी पृथ्वीराज बी. पी. व संबंधित विभागाच्या अधिकाऱ्यांनी एप्रिलमध्ये भेट देऊन तत्काळ नूतनीकरण करण्याचा शब्द गावकऱ्यांना दिला होता.
निधी उपलब्ध होताच डागडुजी...
जिल्हा परिषदेचे कार्यकारी उपअभियंता श्रीनिवास गंगथडे म्हणाले, सदरील पुलाची डागडुजी व नूतनीकरणासाठी १ कोटी १७ लाखांचा प्रस्ताव तयार करून अहवाल मंजुरीसाठी ग्रामविकास खाते व जिल्हा परिषद विभागाकडे मे महिन्यात पाठविला आहे. या विभागातून लवकरच मंजुरी मिळेल. निधी उपलब्ध होताच तत्काळ डागडुजी व नूतनीकरण करण्यात येईल.
सदरील पुलाची दुरवस्था झाली आहे. लवकरात लवकर दुरुस्ती करण्यात यावी, अशी मागणी चांदोरीचे सरपंच विजय सोळुंके यांनी केली आहे.