कोरोनामुक्तीसाठी ग्रामपंचायतींचा पुढाकार
लातूर : जिल्ह्यात ग्रामीण भागात कोरोनाचा प्रादुर्भाव मोठ्या प्रमाणात होत असताना अनेक ग्रामपंचायतींनी कोरोनामुक्तीसाठी पुढाकार घेतला आहे. गावात येणाऱ्या नागरिकांची चौकशी केली जात असून, विनाकारण रस्त्यावर फिरणाऱ्यांवर कारवाई केली जात आहे. तसेच गावातील तरुणांच्या वतीने लसीकरणाबाबत जनजागृती केली जात आहे. दरम्यान, ग्रामीण भागात कोरोनामुक्तीसाठी ग्रामपंचायती पुढाकार घेत असल्याचे चित्र आहे.
समुपदेशन करणारी समिती कागदोपत्रीच
लातूर : कोरोना बाधित रुग्णांचे समुपदेशन करण्यासाठी समुपदेशन समिती स्थापन करण्याचे निर्देश असले तरी ही समिती केवळ कागदाेपत्रीच असल्याचे चित्र आहे. अनेक कोरोना बाधित रुग्णांना मानसिक आजाराची गरज असते. त्यासाठी समुपदेशन समिती गठन करण्याचे तालुकास्तरावर आदेश आहेत. मात्र प्रत्यक्षात ही समिती नावालाच आहे. याकडे संबंधित आरोग्य विभाग तसेच तालुका प्रशासनाने लक्ष देण्याची मागणी होत आहे.
लसीकरणासाठी सामाजिक संस्थांची जनजागृती
लातूर : विविध सामाजिक संस्थांच्या वतीने लसीकरणासाठी जनजागृती मोहीम राबविली जात आहे. ऑनलाईन पद्धतीने नोंदणी कशी करावी, लस घेतल्यानंतर काय काळजी घ्यावी, जवळील लसीकरण केंद्र आदींबाबत जनजागृती केली जात आहे. नागरिकांनी लस घेतल्यानंतर ही योग्य ती काळजी घ्यावी, मास्क, सॅनिटायझर, फिजिकल डिस्टन्सचा अवलंब करावा, असे आवाहन ही सामाजिक संस्थांच्या वतीने करण्यात येत आहे. दरम्यान, यामध्ये विविध महाविद्यालयातील रासेयो स्वयंसेवकांचा सहभाग आहे.
कोविड केअर सेंटरला मदतीचा हात
लातूर : लातूर शहरासह जिल्ह्यात कोरोना बाधितांची संख्या वाढत आहे. त्यामुळे मदत करता यावी, या उद्देशाने विश्वनाथ आल्टे यांनी कोविड केअर सेंटरमधील रुग्णांसाठी सलाईन स्टँड मदत म्हणून दिले आहे. यावेळी महापौर विक्रांत गोजमगुंडे, उपमहापौर चंद्रकांत बिराजदार यांच्या उपस्थितीत सलाईन स्टँड मनपा आरोग्य विभागाकडे सुपूर्द करण्यात आले. याप्रसंगी महेश सिरसाठ, तेली, नगरसेवक युनुस मोमीन, सचिन बंडापल्ले, शंकर जाधव, आनंद सोनवणे, अमोल कदम आदींची उपस्थिती होती.
युवकांच्या पुढाकारातून गरजूंना भोजन
लातूर : शहरातील शासकीय वैद्यकीय रुग्णालयात उपचार घेणाऱ्या रुग्णांच्या नातेवाईकांना युवकांच्या पुढाकारातून मोफत भोजन दिले जात आहे. सकाळ आणि सायंकाळच्या सत्रात मोफत भोजन दिले जात असून, आगामी काळात हा उपक्रम इतर कोविड केअर सेंटर परिसरात राबविण्यात येणार आहे. यशस्वितेसाठी अनिल कोतवाड, योगेश सारसेकर, अक्षय गवळी, अय्याज शेख, कुलभूषण घोडके, विकी गायकवाड, शिवा वेदपाठक, महादू रासे आदी परिश्रम घेत आहेत.