स्टेशन रोडवर महिलेने धावत्या बसखाली उडी मारून केली आत्महत्या

कोल्हापूर : कोल्हापुरात स्टेशन रोडवर एका ६५ वर्षीय वृध्देने सोमवारी सकाळी पावणेअकरा वाजण्याच्या सुमारास धावत्या एस.टी. बसच्या चाकाखाली स्वत:ला झोकून देऊन आत्महत्या केली. यात महिलेचा जागीच मृत्यू झाला. नेहमी गजबजलेल्या या मार्गावर घटना घडल्याने काहीवेळ गोंधळ उडाला. पेहराव्यावरून ही महिला ग्रामीण भागातील असावी, असा पोलिसांचा अंदाज असून सायंकाळपर्यंत तिची ओळख पटविण्याचे काम सुरू होते. महिलादिनीच महिलेवर आत्महत्या करण्याची वेळ आल्याने घटनास्थळी नागरिकांतून हळहळ व्यक्त होत होती.

वय सुमारे ६५ वर्षे तसेच नऊवारी साडी नेसलेली ही महिला स्टेशन रोडवर व्हिनस कॉर्नरनजीक रस्त्याच्या मध्येच आयलॅंडवर बसली होती. सकाळी पावणेअकरा वाजण्याच्या सुमारास मध्यवर्ती बसस्थानकाकडून बाहेर पडलेली एस.टी. बस दसरा चौकाच्या दिशेने जात असताना या महिलेने या धावत्या एस.टी. बसच्या मागील चाकाखाली उडी मारून आत्महत्या केली. बस चालकाच्या ही बाब लक्षात आली नाही. बसच्या पाठीमागून जाणाऱ्या दुचाकीचालकांच्या ही बाब लक्षात आली, त्यांनी ही अपघातग्रस्त बस दसरा चौकात आडवली. संबंधीत महिलेच्या पाठीवरून बसचे चाक गेल्याने ती जागीच गतप्राण झाली होती.

या अपघातामुळे वाहतुकीची कोंडी झाली. तातडीने १०८ रुग्णवाहिका घटनास्थळी दाखल झाली, त्यामधून मृतदेह तातडीने सीपीआर रु्ग्णालयात नेऊन रस्त्यावरील वाहतुकीची कोंडी कमी केली. सायंकाळपर्यंत महिलेची ओळख पटली नव्हती.

संबंधीत महिलेचे वय अंदाजे ६५ वर्षे असून तिच्या अंगावर हिरव्या रंगाची पांढरे टिपके असणारी साडी होती. पेहराव्यावरून ती ग्रामीण भागतील असल्याची शक्यता पोलिसांनी वर्तवली आहे.

स्टॅन्डवरून हटवले

संबंधीत महिलेने सोमवारी सकाळी साडेनऊ वाजण्याच्या सुमारास मध्यवर्ती बसस्थानक परिसरातही बसखाली झोपून आत्महत्या करण्याचा प्रयत्न केला. ही बाब आगार सुरक्षा रक्षकाच्या लक्षात आल्यानंतर त्यांनी तिला स्टॅन्ड परिसरातून हटकले होते. पण त्यानंतर ती स्टेशन रोडवर आली व तिने आपली जीवनयात्रा एस.टी. बसखाली झोकून देऊन संपवलीच.

आत्महत्येचे व्हिडीओ चित्रण व्हायरल

संबंधीत महिला बसखाली आत्महत्या करत असल्याचे परिसरातील सीसीटीव्ही कॅमेऱ्यातील फुटेज सोशल मीडियावर व्हायरल झाल्याने अनेकांनी हळहळ व्यक्त केली.

फोटो नं. ०८०३२०२१-कोल- रोड ॲक्सेडेंट

ओळ : एस.टी. बसखाली आत्महत्या करण्यापूर्वी स्टेशन रोडवर संबंधीत महिला चिंताग्रस्त रस्त्याच्यामध्ये आयलॅन्डवर बसली होती.