‘सर्किट बेंच’च्या निर्णयाची आज दुपारपर्यंत प्रतीक्षा

सर्किट बेंचप्रश्नी गेल्या ३० वर्षांपासून लढा सुरू आहे. वकिलांसह पक्षकार बांधवांनी यापूर्वी प्रथम निवेदन, रॅली, मोर्चे, निदर्शने आदी आंदोलने केली आहेत.

कोल्हापूर : मुंबई उच्च न्यायालयाचे सर्किट बेंच कोल्हापूर येथे स्थापन करावे, या खंडपीठ कृती समितीच्या मागणीवर मुख्य न्यायाधीश मोहित शहा सोमवारी अंतिम निर्णय देण्याची शक्यता होती. मात्र, ही शक्यताच राहिली असून ते मंगळवारी दुपारी तीन वाजेपर्यंत पदभार सोडण्यापूर्वी याबाबत निर्णय घेण्याची शक्यता आता वर्तविली जात आहे. त्यामुळे सहा जिल्ह्यातील वकील या निर्णयाच्या प्रतीक्षेत आहेत. सर्किट बेंचप्रश्नी गेल्या ३० वर्षांपासून लढा सुरू आहे. वकिलांसह पक्षकार बांधवांनी यापूर्वी प्रथम निवेदन, रॅली, मोर्चे, निदर्शने आदी आंदोलने केली आहेत. राज्य शासनाने ‘सर्किट बेंच’ सहा जिल्ह्याकरीता कोल्हापुरात स्थापन करण्याबाबत ठराव संमत करूनही केवळ प्रतीक्षाच करावी लागली आहे. १५ आॅगस्टला पक्षकारांनी जिल्हा न्यायालयासमोर आत्मदहन करण्याचा प्रयत्न केला होता. या आंदोलनाची दखल घेत न्यायाधीश शहा यांनी कोल्हापुरात सर्किट बेंच स्थापन व्हावे, या मागणीच्या सहा जिल्ह्यांच्या ठरावाच्या प्रती व संस्थानकाळातील खंडपीठाची माहिती मागविली होती. त्यानुसार कृती समितीने ठरावांसह संस्थानकाळातील माहिती संग्रहित करून सादरही केली आहे. न्यायाधीश शहा हे आज, मंगळवारी सेवानिवृत्त होत आहेत. त्यापूर्वी ते सोमवारी सायंकाळपर्यंत ‘सर्किट बेंच’चा निर्णय देतील,अशी अपेक्षा वकीलवर्गाला लागून राहिली होती. मात्र, त्यांनी याबाबत काही निर्णय घेतलेला नाही. त्यामुळे आता आज, मंगळवारी न्यायमूर्ती शहा यांनी पदभार सोडण्यापूर्वी सकाळी ११ ते दुपारी ३ वाजेपर्यंत ते याबाबत निर्णय घेतील, अशी अपेक्षा कोल्हापूरसह सहा जिल्ह्यातील वकील मंडळींना आहे. पुण्याचे पालकमंत्री गिरीश बापट यांनीही कोल्हापूरला देता तर पुण्याला का नाही, असे म्हणून विरोध केला आहे. त्याचाही परिणाम शक्य आहे. त्यामुळे न्यायमूर्ती शहा हे काय निर्णय घेतात याकडे तमाम वकील मंडळींसह पक्षकारांचे लक्ष लागून राहिले आहे. (प्रतिनिधी)मुख्य न्यायाधीश मोहित शहा आज, मंगळवारी सेवानिवृत्त होत असून त्यांनी सोमवारी याबाबत निर्णय घेणे अपेक्षित होते. मात्र, आम्ही अजूनही आशा सोडलेली नाही. न्यायमूर्ती शहा हे सायंकाळी पाच वाजता पदभार सोडणार आहेत. तत्पूर्वी सकाळी ११ ते दुपारी ३ वाजेपर्यंत ते कोल्हापूरच्या सर्किट बेंचप्रश्नी निर्णय देतील. त्यामुळे त्यांच्या निर्णयाच्या प्रतीक्षेत आहोत.- अ‍ॅड. राजेंद्र चव्हाण, जिल्हा बार असोसिएशन अध्यक्ष व निमंत्रक, खंडपीठ कृती समिती