सरदार चौगुले
लोकमत न्यूज नेटवर्क
पोर्ले तर्फ ठाणे : माणुसकीच्या धर्मातून वंचितांसाठी काम करणाऱ्या उमेद फाउंडेशनने गरजू, गरीब आणि एक पालकत्व असलेल्या मुलांसाठी ‘उमेद मायेचे घर’ या सामाजिक प्रकल्पाच्या (वसतिगृह) कामाला प्रत्यक्षात सुरुवात केली आहे. लोकसहभागातून उमेदने सुरू केलेल्या या प्रकल्पाला आर्थिक पाठबळाची आवश्यकता आहे. त्यासाठी सामाजिक दायित्वाची गरज मिळाली तरच ही सामाजिक भावनेची संकल्पना पूर्णत्वास जाऊ शकते.
ऊसतोड मजूर, कचरावेचक आणि स्थलांतरित मुलांसाठी शैक्षणिक चळवळतून त्यांच्यात शैक्षणिक उमेद निर्माण करू पाहत आहे. लोकसहभागातून सुरू असलेल्या या सामाजिक संकल्पनेला दायित्वतेच्या पाठबळाची गरज आहे. उमेद कोल्हापूर सांगली, सिंधुदुर्ग आणि जालना जिल्ह्यात सामाजिक चळवळ राबवत असताना काही गरजू आणि वंचित मुलींच्या व्यथा समोर आल्या. त्यांना शैक्षणिक प्रवाहात आणण्यासाठी उमेद फाउंडेशनने दोन वर्षांपासून ‘उमेद मायेचे घर’ या सामाजिक प्रकल्पाला सुरुवात केली आहे. मुलांचे मोफत शिक्षण आणि संगोपनाची जबाबदारी फाउंडेशनने घेतली आहे. सध्या भाडेतत्त्वावर सुरू असलेल्या प्रकल्पासाठी अध्यक्ष प्रकाश गाताडे यांनी १७ लाखांच्या जबाबदारी जमीन घेतली आहे. ३५ लाख रुपये निधीची गरज असलेला प्रकल्पाच्या कामाचा शुभारंभही झाला आहे; परंतु आर्थिक बाब या प्रकल्पाच्या आड येत आहे. उमेदने सुरू केलेल्या सामाजिक कार्याला कोणतीही शासकीय मदत नाही. त्यामुळे सामाजिक कार्याच्या चळवळीला सामाजिक दायित्वतेच्या भावनेची साथ मिळाली तरच माणुसकीचे बंध घट्ट होऊ शकतील.
तरुणाईला स्वावलंबी बनवणार
गरीब, वंचित, एक पालकत्व, दुष्काळग्रस्त, शेतकरी आत्महत्याग्रस्त, स्थलांतरित आणि कचरावेचक मुलांचे मोफत शिक्षण आणि संगोपनाची जबाबदारी उमेद मायेच्या घराच्या माध्यमातून फाउंडेशन करणार असले तरी त्यांच्या संगोपनाचा खर्चही फाउंडेशनला आवाहनात्मक असणार आहे. या वसतिगृहात शाश्वत ग्रामीण विकास प्रशिक्षण केंद्र आणि महिला व युवक रोजगार प्रशिक्षण केंद्र सुरू करून तरुणाईला स्वावलंबी बनवणार आहे.
केोट...
वंचित आणि गरजू मुलांच्या पंखात शिक्षणाचे बळ भरून, त्यांचा सर्वांगीण विकास साधण्याचे काम उमेद फाउंडेशन करत आहे. ‘उमेद मायेचे घर’ या वसतिगृहाच्या माध्यमातून उमेद माणुसकीची भिंती उभ्या करू पाहत आहे. समाजातील मदतीतून चाललेल्या मानवतेच्या मोहिमेला मदतीची गरज आहे.
-प्रकाश गाताडे, उमेद फाउंडेशन, अध्यक्ष