लोकमत न्यूज नेटवर्क
पोर्ले तर्फ ठाणे : अडचणीत सापडलेल्यांना मदत करणे म्हणजे माणुसकीचा धर्म होय. याच माणुसकीच्या धर्मातून वंचितांसाठी काम करणाऱ्या उमेद फाऊंडेशनने गरजू, गरीब आणि एक पालकत्व असलेल्या मुलांसाठी ‘उमेद मायेचं घर’ या सामाजिक प्रकल्पाच्या (वसतिगृह) कामाला प्रत्यक्षात सुरूवात केली आहे. लोकसहभागातून ‘उमेद’ने सुरू केलेल्या या प्रकल्पाला अर्थिक पाठबळाची आवश्यकता आहे. त्यासाठी सामाजिक दायित्वाची साथ मिळाली तरच ही सामाजिक भावनेची संकल्पना पूर्णत्वाला जाऊ शकते. ऊसतोड मजूर, कचरावेचक आणि स्थलांतरित मुलांसाठीच्या शैक्षणिक चळवळीतून त्यांच्यात शैक्षणिक उमेद निर्माण करू पाहत आहे. लोकसहभागातून सुरू असलेल्या या सामाजिक संकल्पनेला दायित्वतेच्या पाठबळाची गरज आहे. उमेद कोल्हापूर, सांगली, सिंधुदुर्ग आणि जालना जिल्ह्यात सामाजिक चळवळ राबवत असताना काही गरजू आणि वंचित मुलींच्या व्यथा समोर आल्या. त्यांना शैक्षणिक प्रवाहात आणण्यासाठी उमेद फाऊंडेशनने दोन वर्षांपासून ‘उमेद मायेचं घर’ या सामाजिक प्रकल्पाला सुरूवात केली आहे. मुलांचे मोफत शिक्षण आणि संगोपनाची जबाबदारी फाऊंडेशनने घेतली आहे. सध्या भाडेतत्त्वावर सुरू असलेल्या या प्रकल्पासाठी अध्यक्ष प्रकाश गाताडे यांनी १७ लाखांची जबाबदारी जमीन घेतली आहे. ३५ लाख रूपये निधीची गरज असलेल्या या प्रकल्पाच्या कामाचा शुभारंभही झाला आहे; परंतु अर्थिक बाब या प्रकल्पाच्या आड येत आहे. ‘उमेद’ने सुरू केलेल्या सामाजिक कार्याला कोणतीही शासकीय मदत नाही. त्यामुळे सामाजिक कार्याच्या या चळवळीला सामाजिक दायित्वतेच्या भावनेची साथ मिळाली तरच माणुसकीचे बंध घट्ट होऊ शकतील.
कोट...
वंचित आणि गरजू मुलांच्या पंखात शिक्षणाचे बळ भरून, त्यांचा सर्वांगिण विकास साधण्याचे काम उमेद फाऊंडेशन करत आहे. ‘उमेद मायेचं घर’ या वसतिगृहाच्या माध्यमातून उमेद माणुसकीची भिंत उभी करू पाहत आहे. समाजाच्या मदतीतून चाललेल्या या मानवतेच्या मोहिमेला मदतीची गरज आहे.
प्रकाश गाताडे, अध्यक्ष, उमेद फाऊंडेशन