लोकमत न्यूज नेटवर्क
कोल्हापूर : काेरोनामुळे सीपीआरमधील बाह्यरुग्ण विभाग बंद असल्याने दिव्यांग दाखल्यासाठी तब्बल ६ हजार अर्जांचा ढीग पडला आहे. आता कोरोना साथ आटोक्यात आली असली तरी अजून दाखले देण्यास सुरुवात झाली नसल्याने दिव्यांगांचे हेलपाटे सुरु आहेत. कोविडचे कारण पुढे करून दिव्यांगांचे दाखले देण्याचे काम कोणी लांबणीवर टाकत असेल तर त्यांच्यावर कारवाई करण्याचे आदेश आरोग्य संचालक डॉ. साधना तायडे यांनी दिले असून, त्या आदेशालाही सीपीआर प्रशासनाने वाटाण्याच्या अक्षता लावल्या आहेत.
कोरोनाची दुसरी लाट तीव्र झाल्यानंतर गेल्या तीन महिन्यांपासून सीपीआरमधील दिव्यांगांना दाखले देण्याची प्रक्रिया थांबविण्यात आली आहे. आता कोरोना ओसरल्यानंतर व्यवहारही पूर्ववत झाले आहेत. शैक्षणिक सत्रही पूर्वपदावर येत आहे. त्यामुळे दाखले मिळावेत म्हणून दिव्यांग सीपीआरमध्ये हेलपाटे मारत आहेत. दहावी व बारावी परीक्षेसाठी अर्ज भरतानाच एक तासाच्या जादा वेळेबरोबरच रायटरची सुविधा घ्यायची असेल तर सीपीआरमधील अधिष्ठातांची सही असलेला दाखलाच गृहित धरला जातो. पण सध्या हे दाखले देणेच बंद असल्याने आणि साधारण ऑक्टोबर, नाेव्हेंबरमध्ये अर्ज भरावे लागत असल्याने दाखला वेळेत मिळाला नाही तर काय, अशी चिंता दिव्यांगांच्या पालकांना सतावत आहे. केंद्र सुरु आहे की नाही, हे पाहण्यासाठी ते रोज चकरा मारत आहेत.
दर बुधवारीच सोय...
सीअीपारमध्ये फक्त बुधवारीच दाखले दिले जातात. त्यामध्ये आर्थोचे ५०, डोळ्यांचे १५, कानाचे १५, मतिमंदत्वाचे १५ यासह २१ प्रकारच्या दिव्यांगत्वासाठीचे दाखले दिले जातात. दिव्यांगाला दाखला मिळवण्यासाठी किमान तीनवेळा हेलपाटे मारावेच लागतात.
चौकट
निर्णय झाला पण अंमलबजावणी नाही
दिव्यांगाना दाखले देण्याच्या प्रक्रियेचे विकेंद्रीकरण करण्याबरोबरच त्यांच्या सोयीसाठी म्हणून सीपीआरव्यतिरिक्त अन्य सरकारी रुग्णालयात दाखले देण्याची सोय उपलब्ध करुन द्यावी, असा शासन निर्णय १४ सप्टेंबर २०१८ला झाला. यानुसार सीपीआरसह शहरातील सावित्रीबाई फुले, पंचगंगा आणि सेवा रुग्णालय तर ग्रामीण भागात गडहिंग्लजसह सर्वच ग्रामीण रुग्णालयांत दाखले देण्याची व्यवस्था व्हायला हवी होती. पण त्याची अंमलबजावणी आजअखेर झालेली नाही. त्यामुळे सीपीआरमध्येच दाखल्यांसाठी झुंबड उडत असल्याचे दिसत आहे.
चौकट
सही कोणाची
सीपीआरमध्ये दिव्यांगाना दाखले देण्यासाठी अंतिम सही अधिष्ठातांची लागते. त्यांच्या सहीशिवाय दाखला गृहित धरला जात नाही, पण गेल्या काही महिन्यांपासून अधिष्ठातांच्या बदलीचा विषय गाजत आहे. वर्षभरात पाच-सहाजण येथे बदली होऊन आले आणि गेले. आता अधिष्ठाता अजित मोरे यांचीदेखील बदली झाल्यानंतर त्यांच्या जागेवर दीक्षित आले आहेत, पण त्यांनी अजून पदभार स्वीकारलेला नाही. सहीत बदल केलेला नसल्याने दाखले देता येत नाहीत.
प्रतिक्रिया
कोरोनामुळे १५ मेपासून दाखले देण्याचे केंद्र बंद करण्यात आले होते. अजून पुढील आदेश नसले तरी पुढील महिन्यात १० तारखेपासू्न दाखले देण्यास सुरुवात करण्याचे नियोजन सुरु आहे.
- विकास चौगुले,
ऑनलाईन दाखले कक्षप्रमुख, सीपीआर, कोल्हापूर.
प्रतिक्रिया
दिव्यांगाना दाखले देण्याची केंद्र वाढवा, अशी वारंवार मागणी करुनदेखील त्याकडे दुर्लक्ष केले जात असल्याने दाखल्यासाठी लांबवरुन यावे लागत आहे. ऑनलाईन नोंद झाल्यानंतर तारीख घेण्यासाठी आणि पुन्हा तपासणीसाठी यावे लागते. यात मोठी अडचण आहे. पुण्यात दाखले द्यायला सुरुवात झाली असताना कोल्हापुरात काय अडचण ते समजत नाही.
- स्वाती गोखले,
समन्वयक, जिल्हा दिव्यांग पुनर्वसन केंद्र, कोल्हापूर.