वाढदिवसाचा फलक फाडल्याने तणाव

क्रशर चौकातील घटना : जिल्हाध्यक्ष - नगरसेवकांच्या कार्यकर्त्यांत जोरदार वादावादीसह धक्काबुक्की

कोल्हापूर : क्रशर चौकात पक्षाच्या जिल्हाध्यक्षाच्या वाढदिवसाचे डिजिटल फलक (फ्लेक्स) फाडल्याच्या संशयावरून शुक्रवारी मध्यरात्री नगरसेवक व जिल्हाध्यक्ष यांच्या कार्यकर्त्यांमध्ये जोरदार वादावादी झाली. यावेळी कार्यकर्त्यांनी एकमेकांस शिवीगाळ करून धक्काबुक्की केल्याने गोंधळ उडाला. या प्रकाराने मात्र शनिवारी दिवसभर परिसरात तणावपूर्ण वातावरण बनल्याने पोलीस बंदोबस्त ठेवण्यात आला होता. महापालिका निवडणुकीच्या पार्श्वभूमीवर इच्छुक उमेदवार वाढदिवस मोठ्या धामधुमीत साजरा करीत आहेत. त्यासाठी शहरात किंवा अन्यत्र वाढदिवस शुभेच्छांचे डिजिटल फलक लावून वातावरण निर्मिती केली जात आहे. आज, रविवारी संबंधित पक्षाच्या जिल्हाध्यक्ष व नगरसेवकाचा वाढदिवस आहे. त्यासाठी त्यांचे शहरात डिजिटल फलक लावण्यात आले आहेत. शुक्रवारी (दि. ४) मध्यरात्री क्रशर चौकात दोघांचे कार्यकर्ते डिजिटल फलक लावण्यासाठी आले. या ठिकाणी जागेच्या वादातून त्यांच्यात जोरदार वादावादी झाली. यावेळी कार्यकर्त्यांत एकमेकांस बघून घेण्याच्या धमक्या देत शिवीगाळ करीत धक्काबुक्की झाल्याने गोंधळ उडाला. या घटनेची माहिती जुना राजवाडा पोलिसांना समजताच त्यांनी घटनास्थळी धाव घेतली. दोन्ही कार्यकर्त्यांना समज देऊन वाद मिटविण्यात आला. दोघांचेही फलक या ठिकाणी लावण्यात आले. त्यानंतर पोलीस निघून गेले. त्यानंतर काही क्षणांतच जिल्हाध्यक्षाचा डिजिटल फलक फाडल्याचे कार्यकर्त्यांना दिसले. त्यांनी या प्रकाराची माहिती जिल्हाध्यक्षाना दिली. ते काही कार्यकर्त्यांसह चौकात आल्याने पुन्हा वातावरण तणावग्रस्त बनले. यावेळी संतप्त झालेल्या कार्यकर्त्यांनी नगरसेवकासह त्यांच्या कार्यकर्त्यांवर गुन्हा दाखल करण्यासाठी जिल्हाध्यक्षांना आग्रह धरला. अखेर निवडणुकीपूर्वी वाद नको, म्हणून जिल्हाध्यक्षाने नरमाईची भूमिका घेत वादावर पडदा टाकल्याची घटनास्थळी चर्चा होती. (प्रतिनिधी)