* जिल्ह्यातील पहिलाच उपक्रम
यड्राव : जांभळी (ता. शिरोळ) येथे बिग बटरफ्लाय मंथनिमित्त आॅक्सिजन पार्कवर ‘बटरफ्लाय वॉक’चे आयोजन केले होते. यामध्ये २८ प्रकारच्या फुलपाखरांची ओळख पटविण्यात आली. जिल्ह्यातील पहिल्याच उपक्रमास उत्स्फूर्त प्रतिसाद मिळाला. फुलपाखरांच्या जीवनचक्राची सविस्तर माहिती फुलपाखरू अभ्यासक डॉ. संतोष उमराणे व सर्वदमन कुलकर्णी यांनी करून दिली.
देशात गेल्या वर्षीपासून सप्टेंबर महिना बिग बटरफ्लाय मंथ म्हणून साजरा केला जातो. यामध्ये फुलपाखरांचे जीवनचक्राच्या प्रवासाची संपूर्ण माहिती घेऊन त्यांचे विश्व उलगडण्याचा प्रयत्न केला जातो. लोकांच्या मनात फुलपाखरे आणि पर्यावरण याविषयी जागृती व्हावी, शास्त्रीय पद्धतीचा वापर करून फुलपाखरांच्या नोंदी करणे आणि त्यांची माहिती संकेतस्थळावर नोंदवणे, जेणेकरून देशातील सर्व माहिती एकाच ठिकाणी नोंदवली जाऊन माहितीकोश तयार होईल आणि भारतातील जैवविविधतेची जपणूक करता येईल, या उद्देशाने जांभळी गावात बटरफ्लाय वॉकच्या माध्यमातून अभ्यास करण्यात आला.
जिल्ह्यात यंदा पहिल्यांदाच असा उपक्रम घेण्यात आला. लहान मुलांसह सर्वांनी यामध्ये सहभाग घेतला. या उपक्रमामुळे झाड आणि फुलपाखरांचे जीवनचक्र यांच्या समन्वयातून अभ्यास सर्वांना करता आला. रंगीबेरंगी फुलपाखरू पाहून बटरफ्लाय वॉक चांगलेच मनमोहक झाले.
भिरभिरणाऱ्या फुलपाखरांची ओळख करून घेताना सर्वजण भारावून गेले. पर्यावरण लेखिका व अभ्यासक चित्कला कुलकर्णी, डॉ. ज्योती बडे, डॉ. शैला कुंभार यांचे मार्गदर्शन बटरफ्लाय वॉकमध्ये उपयुक्त ठरले.
या वेळी डॉ. दशावतार बडे, ऋतिक बडे, देविका बडे, जितेंद्र शिंदे, सलमान कुडचे, आकाश यादव, बाळकृष्ण शिंदे, विनायक भुयेकर, यासीन देसाई, संदीप पाटील, संदीप बिरंजे, अर्जुन मोरे, विनायक कोळी, भगतसिंग गायकवाड, स्वाती ऐनापुरे आदी उपस्थित होते.
फोटो - २००९२०२१-जेएवाय-०६
फोटो ओळ - जांभळी (ता. शिरोळ) येथील आॅक्सिजन पार्कवर फुलपाखरांची ओळख अभ्यासक डॉ. संतोष उमराणे व सर्वदमन कुलकर्णी यांनी करुन दिली.