Kolhapur: एसआयटीच्या प्रमुखपदी रामदास इंगवले, बेपत्ता माजी सरपंच पिळणकर यांचा पुन्हा शोध

आठजणांची एसआयटी 

कोल्हापूर : पाटगाव (ता. भुदरगड) येथील माजी सरपंच महेश दिनकर पिळणकर यांचा शोध घेण्यासाठी पोलिस अधीक्षक योगेश कुमार यांनी एसआयटीची स्थापना केली. गडहिंग्लज उपविभागाचे पोलिस उपअधीक्षक रामदास इंगवले यांची एसआयटीच्या प्रमुखपदी नियुक्ती केली असून, आठजणांच्या स्वतंत्र तपास पथकाने बेपत्ता पिळणकर यांचा कसून शोध घ्यावा, असा आदेश अधीक्षक योगेश कुमार यांनी दिला आहे.

उपअधीक्षक इंगवले यांच्यासह गडहिंग्लज पोलिस ठाण्याचे निरीक्षक अजय सिंदकर, भुदरगड पोलिस ठाण्याचे निरीक्षक गोरख चौधरी, स्थानिक गुन्हे अन्वेषण शाखेचे निरीक्षक सुशांत चव्हाण, सहायक पोलिस निरीक्षक सागर वाघ, सायबरचे उपनिरीक्षक अतिश म्हेत्र, स्थानिक गुन्हे अन्वेषण शाखेतील हवालदार राम कोळी आणि कॉन्स्टेबल राजू कोरे यांची एसआयटीमध्ये नियुक्ती केली आहे. 

सात जानेवारी २०२६ पासून बेपत्ता असलेले माजी सरपंच पिळणकर यांचा शोध घेण्याची जबाबदारी एसआयटीवर दिली आहे. गडहिंग्लज उपविभागाचे अपर पोलिस अधीक्षक तपासाचे पर्यवेक्षण करणार आहेत. वेळोवेळी तपासाचा अहवाल सादर करण्याचा आदेश पोलिस अधीक्षकांनी एसआयटीला दिला आहे. एसआयटीमुळे बेपत्ता पिळणकर यांचा शोध गतिमान होईल, अशी अपेक्षा त्यांच्या नातेवाइकांनी व्यक्त केली.