Kolhapur-TET Paper leak case: सात आरोपी अद्याप फरार, २६ जणांवर गुन्हा नोंद 

१९ आरोपींना अटक

मुरगूड : सोनगे येथील उघडकीस आलेल्या टीईटी पेपर फुटीप्रकरणी आतापर्यंत २६ जणांवर गुन्हा नोंद झाला असून, यातील १९ आरोपींना अटक करण्यात यश आले आहे. यातील सात आरोपी अद्याप फरार आहेत. या सर्वांना शोधण्यासाठी विविध ठिकाणी पोलिस पथके रवाना झाली आहेत.

बिहारमधील मुख्य आरोपी रितेशकुमार जोपर्यंत हातात येत नाही तोपर्यंत तपास पुढे जाणार नाही. पोलिस उपअधीक्षक सुजित क्षीरसागर यांनी मुरगूड पोलिस स्टेशनला भेट देऊन महेश गायकवाडसह अन्य आरोपींची कसून चौकशी केली.

वाचा- टीईटी पेपर फुटीप्रकरणी प्रभारी प्राचार्य, प्राध्यापकाचे निलंबन

काही आरोपींनी पेपर फुटला, याला दुजोरा दिला असल्याने त्या दृष्टीने पुरावे गोळा करण्याचा प्रयत्न सुरू आहे. सुजित क्षीरसागर म्हणाले, महाराष्ट्र राज्य परीक्षा मंडळ माहिती देण्यास टाळाटाळ करत असले तरी त्यांनी माहिती देणे बंधनकारक असून, त्या दृष्टीने आमचे प्रयत्न असल्याचे सांगितले. शिवाय जे आरोपी अटक केले होते, त्यातील शिक्षक व प्राध्यापक यांचा गुन्ह्यातील सहभाग निश्चित असल्याचे त्या त्या शैक्षणिक संस्थेस आपण कळवले असल्याचे सांगितले.

आरोपींकडून मिळालेल्या परीक्षार्थींना तपासासाठी मुरगूड पोलिसातून फोन केले जात आहेत. पण, यातील बऱ्याच लोकांचे फोन बंद लागत आहेत.