हातकणंगले : येथील एका मंदिराच्या बाजूला भाडोत्री घरामध्ये सुरू असलेल्या वेश्या अड्ड्यावर शनिवारी सायंकाळी अतिरिक्त पोलीस अधीक्षक जयश्री गायकवाड यांच्या विशेष पथकाने छापा टाकून पीडित महिलेसह एकाला रंगेहाथ पकडले. या छाप्यावेळी पोलिसाच्या हातावर तुरी देऊन पळून गेलेला एजंट ज्ञानेश्वर शंकर सावंत (रा. अमोल बेकरीजवळ, कोरोची) हा पोलिसांचा हस्तक असल्याचे उघड झाले असून, त्याला पळून जाण्यासाठी पोलीस ठाण्याच्या दोन कर्मचाऱ्यांनी मदत केल्याचे स्पष्ट झाले आहे.
कोल्हापूर - सांगली राज्य मार्गावर हातकणंगले पोलीस ठाण्यापासून अवघ्या एक किलोमीटर अंतरावर असलेल्या एका मंदिराच्या दक्षिणेकडील अमर माळवे यांच्या मालकीच्या भाडोत्री घरात गेल्या काही दिवसांपासून वेश्या व्यवसाय सुरु असल्याची माहिती अतिरिक्त पोलीस अधीक्षक जयश्री गायकवाड यांना खबऱ्यांमार्फत मिळाली. यातील संशयित ओंकार पन्हाळकर व ज्ञानेश्वर सावंत हे मोबाईलवर फोटो पाठवून ग्राहकांना आकर्षित करत होते, तर पीडित माहिलांना वेश्यागमनासाठी प्रवृत्त करत होते.
विशेष पथकाने बोगस गिऱ्हाईक पाठवून प्रथम खात्री केली व त्यानंतर आरोपींना रंगेहाथ पकडले.
फोटो = ज्ञानेश्वर सावंत आणि पोलीस कर्मचारी.