राधानगरी : रंगपंचमीच्या सुट्टीचा आनंद घेण्यासाठी राधानगरी धरणावर आलेल्या कोल्हापुरातील सात मित्रांपैकी एका सराफ व्यावसायिकाचा राधानगरी धरणात बुडून मृत्यू झाला. विवेक कमलाकर नागवेकर (वय ४५ रा. नागाळा पार्क, कोल्हापूर) असे त्यांचे नाव आहे. शुक्रवारी सायंकाळी ही दुर्घटना घडली. शनिवारी सकाळी त्याचा मृतदेह सापडला.
अधिक माहिती अशी, कोल्हापुरातील हे मित्र कालची सुट्टी घालवण्यासाठी राधानगरी धरणाच्या बॅकवॉटर क्षेत्रातील राऊतवाडी धबधबा परिसरात आले होते. धरणाकाठच्या एका रिसॉर्टमध्ये ते थांबले होते. सायंकाळी येथील तिघेजण पोहण्यासाठी धरणाच्या पाण्यात उतरले. मात्र पाण्याचा अंदाज न आल्याने नागवेकर हे बुडाले. सोबतच्या मित्रांनी आरडाओरडा केल्यावर राऊतवाडी येथील काही ग्रामस्थ व रिसॉर्टमधील कर्मचाऱ्यांनी त्यांना शोधण्याचा प्रयत्न केला मात्र ते सापडले नाहीत. रात्र झाल्याने हे प्रयत्न थांबले. आज सकाळी त्यांचा मृतदेह पाण्यात तरंगताना आढळला. राधानगरी पोलिसांनी घटनेचा पंचनामा केला. सोळांकूर येथील ग्रामीण रुग्णालयात शवविच्छेदन करून मृतदेह नातेवाइकांकडे देण्यात आला.