‘आशां’चे तीन कोटी रुपये तालुक्यांना वर्ग

कोल्हापूर : ग्रामविकास मंत्री हसन मुश्रीफ यांनी तराटणी दिल्यानंतर दुसऱ्याच दिवशी ‘आशा’ आणि गटप्रवर्तकांच्या मानधनाचे तीन कोटी रुपये दुसऱ्याच दिवशी, मंगळवारी तालुक्यांना वर्ग करण्यात आले आहेत.

‘माझे कुटुंब, माझी जबाबदारी’ योजनेतील आणि वाढीव मानधनाची रक्कम मिळावी यासाठी ‘आशां’नी जिल्हा परिषदेसमोर सात तास रास्ता रोको केला होता. याबाबत मुश्रीफ यांनी जिल्हा परिषदेचे मुख्य कार्यकारी अधिकारी अमन मित्तल यांना शासकीय विश्रामगृहावर बोलावून ‘कारणे सांगू नका, मानधन देऊन टाका,’ अशा स्पष्ट सूचना केल्या होत्या.

त्यानुसार ‘माझे कुटुंब, माझी जबाबदारी’ पहिल्या टप्प्यातील ३०८५ ‘आशां’चे ३८ लाख ८२ हजार मानधन मंगळवारी तालुक्याला पाठविण्यात आले आहे. तसेच कोरोनाच्या काळामध्ये गटप्रवर्तक यांना तीन हजार आणि ‘आशां’ना दोन हजार वाढीव मानधनाची घोषणा मुख्यमंत्री उद्धव ठाकरे यांनी केली होती. त्याचे दोन कोटी ३९ लाख ४४ हजार रुपयेही तालुक्याला वर्ग करण्यात आले आहेत. जुलै, ऑगस्ट, सप्टेंबर आणि ऑक्टोबर या चार महिन्यांचे हे वाढीव मानधन आहे.

इचलकरंजी नगरपालिकेच्या कार्यक्षेत्रात कार्यरत असणाऱ्या ११० आशांचे आठ लाख ४८ हजार रुपयेही वितरित करण्यात आले आहेत. कोल्हापूर महापालिकेकडे २०५ आशा कार्यरत असून त्यांच्या मानधनाची १४ लाख ४० हजार रुपयांची रकमेची फाईल अंतिम टप्प्यात असल्याचे सांगण्यात आले. तालुका आरोग्याधिकाऱ्यांकडे ही रक्कम वर्ग करण्यात आली असून, ती दोन दिवसांत संबंधितांच्या खात्यावर जमा होणार आहे.