लोकमत न्यूज नेटवर्क
सरुड : भेडसगाव नागरी सहकारी पतसंस्थेस नुकत्याच संपलेल्या आर्थिक वर्षात १ कोटी ३५ लाखांचा नफा झाल्याची माहिती संस्थेचे संस्थापक अध्यक्ष व जिल्हा परिषदेचे बांधकाम व आरोग्य समिती सभापती, हंबीरराव पाटील-भेडसगावकर यांनी दिली.
ते म्हणाले यंदाच्या ठेवीमध्ये १०.३२ टक्के वाढ होऊन एकूण ठेवी १०४ कोटी ५३ लाख झाल्या आहेत. कर्जवाटपामध्ये १०.७७ टक्के वाढ होऊन ७४ कोटी २३ लाख इतके कर्जवाटप केले आहे. चालू वर्षात जागतिक महामारी कोरोना प्रादुर्भावामुळे ठेवीवर व कर्ज वसुलीवर परिणाम झाला आहे; तरीही संस्थेने १०० कोटींचा टप्पा यशस्वीपणे पार केला आहे. कर्जवसुली ९५ टक्के केली असून संस्थेचा नेट एनपीए ० टक्के आहे. संस्थेच्या एकूण व्यवसाया मध्ये १०.८८ टक्क्यांनी वाढ होऊन एकूण ठेवी १०४.५२ कोटी व ७४.२३ कोटी कर्ज असा १७८.७५ कोटींचा व्यवसाय संस्थेने केला आहे. संस्थेने सध्या एकूण ठेवीच्या ३९.३२ टक्के म्हणजेच ४१.१० कोटी इतकी गुंतवणूक इतर बँकांत केली आहे. पुढील वर्षात संस्था १२५ कोटीं ठेवीचा टप्पा पार करण्याचा मानस आहे. संस्थेचे भाग भांडवल व निधी १२ कोटी ९६ लाख असून सभासदांना १० टक्के लाभांश प्रतिवर्षी दिला जातो. मृत सभासदांच्या वारसांना विशेष सवलत, आजारी सभासदांना मदत निधी, संस्थेतील कर्मचारी व सभासद यांना ३ लाखाचा मेडिक्लेम व संस्था कर्मचाऱ्यांचा १० लाखांचा विमा संस्थेने उतरला असल्याचेही हंबीरराव पाटील यांनी सांगितले. यावेळी संस्थेचे व्हाईस चेअरमन पांडुरंग डांगे , भेडसगावचे सरपंच अमरसिंह पाटील, सर्व संचालक मंडळ उपस्थित होते.