मनपाच्या हॉस्पिटल्सची झाडाझडती

‘स्थायी’च्या सदस्यांची मोहीम : गंभीर त्रुटींची दखल; आरोग्य यंत्रणेची यशस्वी शस्त्रक्रिया करू : फरास

कोल्हापूर : महापालिकेच्या सावित्रीबाई फुले, आयसोलेशन व पंचगंगा रुग्णालयांना आज, सोमवारी स्थायी समिती सभापती आदिल फरास व नगरसेवकांनी भेटी दिल्या. काही ठिकाणी आवश्यक मशिनरी, औषध साठा, इमारतीच्या दुरुस्तीची गरज असल्याचे मत फरास यांनी पाहणीनंतर सायंकाळी महापालिकेत झालेल्या पत्रकार परिषदेत व्यक्त केले. मात्र, कामचुकार कर्मचारी व आर्थिक साखळीत अडकलेले यंत्रणेतील ‘झारीतील शुक्राचार्यां’मुळेच आरोग्य यंत्रणेला अवकळा आली आहे. अखेरची घटका मोजत असलेल्या या आरोग्य यंत्रणेची यशस्वी शस्त्रक्रिया करून सक्षम करण्यास अग्रक्रम राहणार असल्याचे फरास यांनी यावेळी नमूद केले.मनपाची शहरातील मोठी महत्त्वाची तीन व प्रभागातील लहान १४ रुग्णालये अद्ययावत करण्यासाठी आवश्यक असणाऱ्या साधनसामग्री व सुविधा उपलब्ध करून देण्याचा प्रस्ताव स्थायी समिती सभेसमोर सादर करण्याच्या सूचना संबंधित अधिकाऱ्यांना फरास यांनी भेटीदरम्यान दिल्या. यावेळी नगरसेवक सचिन चव्हाण, प्रकाश गवंडी, राजू हुंबे, शारंगधर देशमुख, संभाजी जाधव, इंद्रजित बोंद्रे, नगरसेविका संगीता देवेकर, ज्योत्स्ना मेढे, प्रभा टिपुगडे, माधुरी नकाते, आरोग्याधिकारी डॉ. दिलीप पाटील, वैद्यकीय अधिकारी व कर्मचारी उपस्थित होते. (प्रतिनिधी)

शहरातील नामवंत वैद्यकीय तज्ज्ञांना मनपाच्या रुग्णालयांत आठवड्यातून दोन दिवस मोफत सेवा देण्याबाबत विनंती केली आहे. अनेकांनी होकार कळविला आहे. महापौरांच्या अध्यक्षतेखाली लवकरच याबाबत बैठक घेऊ. सुरक्षेच्या कारणास्तव सोडून गेलेल्या अकरा वैद्यकीय तज्ज्ञांना पुन्हा सेवेत घेण्याचा प्रयत्न सुरू आहे. आरोग्य यंत्रणेच्या आडवे येणाऱ्या कोणाचीही गय केली जाणार नाही. अचानक भेटींचे सत्र सुरू ठेवून यंत्रणेला सजग ठेवण्याचा प्रयत्न राहील. त्यासाठी स्थायी सदस्यांचे पाठबळ आहेच, नगरसेवकांचेही सहकार्य मिळेल, अशी अपेक्षा आहे.
- आदिल फरास,
स्थायी समिती सभापती


पंचगंगा रुग्णालय
तब्बल ३० लाख रुपये खर्चून पंचगंगा रुग्णालयाचा कायापालट केला. मात्र, डॉक्टर्सच्या कमतरतेमुळे रुग्णालयात फक्त दोनच रुग्ण आढळले. पिण्याच्या पाण्याच्या टाकीला गळती लागल्याने रुग्णालयामध्ये पाणीटंचाई आहे. सोलर यंत्रणेतही बिघाड झाला आहे. शहरासह ग्रामीण भागातील नागरिकांना सोयीचे असलेल्या रुग्णालयात रुग्णांची वर्दळ वाढविण्याचे आव्हान प्रशासनासमोर आहे.


आयसोलेशन रुग्णालय
शहरापासून लांब व निर्जन ठिकाणी असल्याने रुग्णालयास भुरट्या चोरांचा मोठा त्रास होत आहे. कर्मचारी व वैद्यकीय तज्ज्ञांची कमतरता आहे. रात्रीच्या वेळी आलेल्या रुग्णांना प्रवेश नाकारला जातो. दारे मोडकळीस आली आहेत. सुरक्षा रक्षक नेमून परिसरातील अवैध वावर रोखण्याचे प्रशासनाला प्रयत्न करावे लागणार आहेत.


सावित्रीबाई फुले रुग्णालय
नगरसेवक ांच्या भेटीमुळे पाहणी केल्याने मनपाची सुस्तावलेली आरोग्य यंत्रणा खडबडून जागी झाली. रुग्णालयात सर्वांत अधिक भोंगळ कारभार असल्याचे निदर्शनास आले. डॉक्टर्स वेळेवर कामावर येत नाहीत. वॉर्डबॉयची नेमणूक असलेला एक्स रे मशीन चालवितो. कर्मचारी संघटनेच्या धाकाने अनेकजण फक्त मस्टरवर सही करून पगार लाटतात. दवाखान्याच्या इमारतीला गेल्या २५ वर्षांत रंग लागलेला नाही. सदस्यांसमोर कर्मचाऱ्यांनी तक्रार करू नये यासाठी दोन दिवसांपासूनच फिल्डिंग लावण्यात आली होती. सदस्यांनी काही कर्मचाऱ्यांशी बंद खोलीत चर्चा करून दवाखान्याची माहिती घेतली.


आर्थिक साखळी
गर्भवती महिलांसाठी थॉयरॉईडची चाचणी गरजेची नसते. मात्र, निव्वळ कमिशनसाठी थॉयरॉईडसह इतर सोनोग्राफी चाचण्या रुग्णांवर लादल्या जातात. या चाचण्यांतून मिळणाऱ्या कमिशनचा धनादेश आगाऊ दिला जातो. यंत्रणेत मोठी आर्थिक साखळी अडकलेली आहे. कमिशनपोटी हे सर्व केले जात असल्याने प्रत्येक आठवड्यात ओळखीचे रुग्ण पाठवून यंत्रणेवर लक्ष ठेवणार असल्याचे फरास यांनी स्पष्ट केले.
रुग्णालयातील प्रयोगशाळा, सोनोग्राफी मशिनरी, एक्सरे मशीन आदींसह शस्त्रक्रियेसाठी आवश्यक साम्रगीची दुरुस्ती व नव्याने खरेदी करावी लागणार आहे. रुग्णालयांकडे तब्बल १२००हून अधिक कर्मचारी
आहेत. ही सर्व यंत्रणा उपलब्ध असूनही
आरोग्य सेवेची जाण नसल्याने रुग्णांचे हाल होत असल्याचे भेटीदरम्यान नगरसेवकांच्या ध्यानात आले.