कोल्हापूर : वाढत्या गुन्हेगारीच्या पार्श्वभूमीवर शहरातील गुंडांच्या तीन टोळ्यांवर मोक्कांतर्गत कारवाईचे प्रस्ताव तयार करून मंजुरीसाठी पाठवले आहेत, त्याशिवाय ३८ गुंडांना तडीपार, तर सात झोपडपट्टीदादांना वर्षासाठी स्थानबध्द करणार असल्याची माहिती जिल्हा पोलीस अधीक्षक शैलेश बलकवडे यांनी पत्रकारांशी बोलताना दिली.
अधीक्षक बलकवडे म्हणाले, आगामी काळात महानगरपालिकेसह विविध संस्थांच्या निवडणुका असल्याने कायदा व सुव्यवस्था राखण्यासाठी उपाययोजना म्हणून गुन्हेगारांच्या कारवायांवर वचक ठेवण्यात येणार आहे. गंभीर गुन्ह्यांची चौकशी पोलीस उपअधीक्षकांमार्फत करण्यात येत आहे. त्यासाठी पोलीस ठाण्याच्या हद्दीतील सराईत गुन्हेगारांच्या कुंडल्या तयार केल्या आहेत. गुंडांच्या टोळ्या मोडीत काढण्यासाठी शहरातील तीन टोळ्यांवर मोक्कांतर्गत कारवाईचा प्रस्ताव करून तो मंजुरीसाठी पाठवला आहे. २०१९-२० या वर्षामध्ये एकाही झोपडपट्टीदादावर कारवाई केलेली नाही. शिरोळ, दानोळी, जयसिंगपुरातील दारू, हातभट्टीवाले झोपडपट्टीदादा असलेल्या सात जणांना वर्षभरासाठी स्थानबध्द करण्याचा प्रस्ताव तयार केला आहे. गेल्या आठवड्यात जिल्ह्यात दारू, जुगार, मटका जुगार याबाबत ३०० ठिकाणी छापे टाकले, तर ३२९ आरोपींवर कारवाई केली.
एस.टी. गॅंगवर ‘मोक्का’साठी प्रयत्न
चार दिवसांपूर्वी शाहू टोल नाक्यावर हॉटेल व्यावसायिकांवर झालेल्या हल्ला प्रकरणातील गेंड्यासह सर्व आरोपींचा गुन्हेगारीचा पूर्वेतिहास तपासून त्यांच्यावर मोक्का लावण्याबाबत प्रयत्न करणार असल्याचे अधीक्षक बलकवडे यांनी सांगितले.
वीकेंड लॉकडाऊनमध्ये २९८२ जणांवर कारवाई
वीकेंड लॉकडाऊनच्या दोन दिवसात जिल्ह्यात विनामास्कबाबत ९४५ जणांकडून १,३७,९०० रुपये दंड वसूल केला. लॉकडाऊनचा भंग करणाऱ्या १९३७ वाहतूकदारांकडून २,६४,२०० रुपये दंड वसूल केला.
कोरोना प्रतिबंधक लस घेतली २२०० पोलिसांनी
जिल्ह्यातील दोन पोलीस अधिकारी व दोन पोलीस कोरोना पॉझिटिव्ह आले, तर सुमारे २२०० पोलिसांनी कोरोना प्रतिबंधक लसीचा पहिला डोस घेतला, तर दुसरा डोस हा १५ टक्के पोलिसांनी घेतला. दुसरा डोस ४५ नंतर घेतल्यानंतर परिणामकारक ठरत असल्याच्या माहितीमुळे पोलीस दुसरा डोस घेण्यास उशीर करत असल्याचेही अधीक्षक बलकवडे यांनी सांगितले.