मंत्री येता दारी, डांबर पडे रस्त्यावरी

कोल्हापूर : मंत्री येता दारी, डांबर पडे रस्त्यावरी असा अनुभव सध्या जिल्हा परिषद परिसरातील नागरिकांना येत आहे. गेल्या आठ दिवसांपूर्वी खोदलेला रस्ता डांबरी करण्याचे काम युद्धपातळीवर सुरू असून, ज्येष्ठ नेते शरद पवार यांच्यासह अनेक मंत्री या रस्त्यावरून जाणार असल्याने कोल्हापूर महापालिकेने ही गडबड सुरू केली आहे.

पवार यांच्यासह माजी मुख्यमंत्री पृथ्वीराज चव्हाण, मंत्री जयंत पाटील, हसन मुश्रीफ, बाळासाहेब पाटील, सतेज पाटील, राजेंद्र पाटील-यड्रावकर यांच्यासह अनेक मान्यवर याच रस्त्यावरून जिल्हा परिषदेत येणार आहेत. या ठिकाणी यशवंतराव चव्हाण यांच्या पुतळ्याचे त्यांच्या हस्ते अनावरण होणार आहे.

गेल्या पंधरवड्यामध्ये जिल्हा परिषदेसमोरून केबल टाकण्यासाठी मोठी खुदाई करण्यात आली होती. चर बुजविल्यानंतर गेले आठ-दहा दिवस येथे धुळीचे साम्राज्य होते. मात्र, सोमवारी हसन मुश्रीफ यांनी जिल्हा परिषदेत आल्यानंतर शहर अभियंता नेत्रदीप सरनाेबत यांना फोन लावून रस्त्याचे डांबरीकरण करण्याच्या सूचना केल्या. त्यानुसार मंगळवारी दुपारपासून या ठिकाणी काम सुरू झाले आहे. चर भरून त्यावर मोठी खडी टाकण्यात आली. खड्डे पडलेल्या रस्त्यावर डांबर ओतण्यात आले आहे. जादा यंत्रणा लावून सायंकाळी उशिरापर्यंत या ठिकाणी काम सुरू होते.

चौकट

रस्ता करा, पण.....

मंत्री येणार म्हणून रस्त्यावर डांबर ओतण्यापेक्षा नेहमीचे काम म्हणून महापालिका ही कामे तातडीने का करत नाही, असा सवाल यानिमित्ताने येथील नागरिकांनी उपस्थित केला आहे. जर मंत्री आले नसते, तर आम्हाला महिनाभर धुरळा खावा लागला असता. त्यामुळे मंत्री येण्याला आणि डांबर पडण्याला आमचा विरोध नाही; पण नागरिकांना काय त्रास होतो याचा विचार करून महापालिकेने कामकाज करण्याची गरज व्यक्त करण्यात आली.

१९०१२०२१ कोल झेडपी ०१/०२/०३

ज्येष्ठ नेते शरद पवार आणि मंत्री शुक्रवारी जिल्हा परिषदेत येणार आहेत. या पार्श्वभूमीवर मंगळवारी जिल्हा परिषदेसमोरील रस्त्याच्या डांबरीकरणाचे काम युद्धपातळीवर हाती घेण्यात आले.

छाया - समीर देशपांडे