उचत ( ता . शाहूवाडी ) येथे रविवारी मध्यरात्री झालेल्या अवकाळी पाऊस वादळी वाऱ्याने शामराव श्रीपती पाटील यांच्यासह तीन कुटुंबाच्या घरावर वीज पडून सुमारे सहा लाख रुपयांचे नुकसान झाले आहे.
रविवारी मध्यरात्री आलेल्या विजेचा कडकडाट व वादळी वाऱ्याने उचत येथील शामराव पाटील, सुरेश पाटील ,किरण पाटील व आनंदा पाटील या चार कुटुंबियांची 18 माणसं घरामध्ये झोपली होती.
मध्यरात्रीच्या सुमारास आलेले वादळी वारे आणि विजेचा कडकडाट पावसामुळे घरावर विजेचा लोळ पडला व वाऱ्याने घरावरील पत्र्याचे शेड घरापासून विरुद्ध बाजूला सुमारे तीनशे फूट अंतरावर शेतात विखरून पडले होते. रात्रीच्या वेळी घडलेल्या या घटनेने पाटील कुटुंबियांत भीतीचे वातावरण पसरले होते. या नुकसानीत वरील कुटुंबियांचे सुमारे सहा लाख रुपयांचे नुकसान झाले आहे.
या घटनेत घरावरील पत्रे, लोखंडी अँगल हे घरासमोर तीनशे फूट अंतरावरील ऊस शेतीत विखरून पडले होते. यावरूनच या वाऱ्याची विदारकता समोर येते.
शेतात सर्वत्र विखरून पडलेले पत्रे दिसत होते.
पोलीस पाटील संदीप बोरगे, कुमार पाटील यांनी सदर घटनेची माहिती महसूल प्रशासनाला कळवली. घटनास्थळी महसूल प्रशासनाचे वरिष्ठ अधिकारी यांच्यासह तलाठी यांनी येऊन पंचनामा केला.