कोल्हापूर : कोल्हापूरच्या चित्रनगरीत आता मराठीबरोबरच हिंदी मालिकांचे चित्रीकरण सुरू झाले आहे. ‘मेहंदी है रचनेवाली’ या मालिकेचे बाह्य चित्रीकरण आतापर्यंत सुरू होते. आता याच मालिकेचे नव्याने बांधण्यात आलेल्या अंतर्गत स्टुडिओमध्ये शनिवारपासून प्रत्यक्षात चित्रीकरणास सुरुवात झाली.
चित्रनगरीत अंतर्गत दोन सेट आणि बाह्य परिसरात तीन असे एकूण पाच सेट लागले आहेत. त्याद्वारे या हिंदी मालिकेच्या चित्रीकरणास गेल्या काही दिवसांपासून सुरुवात झाली आहे. लाॅकडाऊननंतर मुंबई, पुण्यातील सर्व प्रकारच्या मालिकांचे चित्रीकरण बंद झाले आहे. त्यामुळे आपोआप कोल्हापूरच्या चित्रनगरीकडे मुंबईकरांची पावले वळू लागली. त्याचा परिणाम म्हणून नूतनीकरण केलेल्या चित्रनगरीत अनेकांच्या हाताला काम मिळू लागले. त्यामुळे महेश कोठारे यांच्या दख्खनचा राजा जोतिबा मालिका, तसेच पाच ते सहा चित्रपटांचे गेल्या तीन महिन्यांपासून चित्रीकरण सुरू आहे. आता मेहंदी है रचनेवाली या हिंदी मालिकेचेही चित्रीकरण सुरू झाले आहे. त्यातील बाह्य चित्रीकरण आतापर्यंत सुरू होते. शनिवारी अंतर्गत (इनडोअर) चित्रीकरणास प्रारंभ झाला. त्यामुळे मराठी, हिंदी मालिकांमधील दिग्गजांचा राबता या चित्रनगरीत वाढला आहे. अनेक स्थानिक कलाकारांनाही काम मिळत आहे.