Kolhapur News: लॅबचालकास रुग्णांचे पैसे परत करण्याचे आदेश देऊ, अधिष्ठातांचे आश्वासन 

सीपीआरमधील लॅब सुरू असल्याचा दिखावा...

कोल्हापूर : येथील सीपीआरमध्ये काही डॉक्टर खासगी रक्ततपासणी लॅबशी संगनमत करून आर्थिक लुबाडणूक केल्या प्रकरणाची स्वतंत्र समिती करून चौकशी केली जाईल, संबंधित लॅबचालकाचा शोध घेऊन घेतलेले पैसे रुग्णांना परत देण्यास भाग पाडू, असे आश्वासन सीपीआरचे अधिष्ठाता सदानंद भिसे यांनी शुक्रवारी स्वाभिमानी संभाजी ब्रिगेडच्या शिष्टमंडळास दिले. यावेळी शिष्टमंडळातर्फे भिसे यांना निवेदन देण्यात आले.

निवेदनात म्हटले आहे, सीपीआरमध्ये गरीब रूग्ण उपचार मोफत मिळतात म्हणून येतात. पण येथील काही डॉक्टर त्यांना लुटत आहेत. खासगी लॅबचालकाकडे पाठवून पन्नास टक्के कमिशनचा धंदा मांडल्याचे आम्ही उघड केले. त्याची सखोल आणि निपक्षपातीपणे चौकशी करावी. प्रसूती विभागात दैनंदिन खासगी लॅबचे एजंट वावरतात. नातेवाईकांकडे चौकशी केलेली रक्कम एका दिवसाची दीड ते दोन लाख रुपयांची आहे.

वाचा : तुमच्या कार्यपद्धतीमुळे माणसे रस्त्यावर मरतील, सीपीआरच्या कारभारावर मंत्री आबिटकर संतापले 

याप्रकरणी दोषी डॉक्टरांवर फौजदारी गुन्हा दाखल करावा. सीपीआरमध्ये नोकरी करणाऱ्या डॉक्टरांना नियमाप्रमाणे पूर्ण दिवस सेवा देण्यास भाग पाडावे. हालचाल वहीत नोंदी कराव्यात. बायोमेट्रिक, फेस रीडिंग बंधनकारक करावे. यावेळी जिल्हाध्यक्ष रुपेश पाटील, राहुल पाटील, अभिजित कांजर, सरदार पाटील, हरीश पाटील, प्रशांत निगडे, सतीश पाटील, राजेंद्र जोशी आदी उपस्थित होते.

सीपीआरमधील लॅब सुरू असल्याचा दिखावा...

खासगी लॅबचालकांशी संगनमत असल्याने सीपीआरमधील लॅब दिखाव्यासाठी सुरू ठेवले जाते. रात्रपाळीत येथे रक्ततपासणी केली जात नाही, अशी तक्रार रूपेश पाटील यांनी केली. सीपीआरमधील रक्तचाचणी लॅब २४ तास सुरू ठेवावी, अशी मागणीही त्यांनी केली.