लोकमत न्यूज नेटवर्क
कोल्हापूर : कोल्हापूर जिल्हा सहकारी दूध उत्पादक संघाच्या निवडणुकीत सत्तारूढ आघाडीने सत्तेचा दावा केला असला तरी, विरोधकांचीच सरशी होणार असल्याचे ’लोकमत’ने मतदानानंतर सोमवारच्या अंकात अगदी स्पष्टपणे जाहीर करून गोकुळ दूध संघाचा निकाल काय लागेल, याचा अंदाज वर्तवला होता. तो निकालानंतर तंतोतंत खरा ठरला आहे.
निवडणूक लोकसभेची असो, विधानसभेची असो, की जिल्हा परिषद, महापालिकेची असो; गेल्या दहा वर्षात ‘लोकमत’ने कोणत्याही निवडणुकीचे अंदाज निकालाच्या आधीच वर्तवले आहेत आणि ते तंतोतंत खरे ठरले आहेत. ‘लोकमत’ने २००९ च्या लोकसभा निवडणुकीत मंडलिक-शेट्टी विजयी होणार, असे महिनाभर अगोदर जाहीर केले होते. २०१४ च्या लोकसभा निवडणुकीतही निकालापूर्वीच धनंजय महाडिक-शेट्टी विजयी होणार, असा अंदाज वर्तवला होता. त्यानंतर २०१४ च्या विधानसभा निवडणुकीत शिवसेनेचे सहा आमदार विजयी होणार असल्याचे जाहीर केले होते, निकालही तसाच लागला. विधानसभेच्या गेल्या निवडणुकीत दहा मतदार संघात कोण-कोण विजयी होणार, त्यांची नावेच ‘लोकमत’ने प्रसिध्द केली. निकालही अगदी तंतोतंत तसाच लागला.
गोकुळच्या निवडणुकीत पहिल्या दिवसापासून वार्तांकनात ‘लोकमत’ सर्वात पुढे राहिला. या निवडणुकीतील निर्णायक ठरू शकणाऱ्या घडामोडी ‘लोकमत’ने अगोदर दिल्या. त्यानुसारच निकालाचा कलही दिला. क्रॉस व्होटिंग झाले नाही, तर संघात सत्तांतर होणार असल्याचे वृत्त ‘लोकमत’ने सोमवारीच दिले होते. त्यानुसारच संघाच्या निवडणुकीचा निकाल लागला आहे.