गडहिंग्लज : गॅस, पेट्रोल व डिझेल या इंधन दरवाढीच्या विरोधात गडहिंग्लज प्रांत कचेरीसमोर महिला कृती समितीतर्फे जोरदार निदर्शने करण्यात आली. महिला दिनीदिवशीच महिलांनी गॅस दरवाढ कमी करण्यासाठी चूल मांडून प्रांत कार्यालयाच्या दारात अन्न शिजवून आणि शंखध्वनी करून केंद्र सरकारचा निषेध नोंदविला.
शहरातील लक्ष्मी मंदिर ते प्रांतकचेरी अशी निषेध फेरी काढण्यात आली. प्रांत कार्यालयाजवळ गॅस सिलिंडरच्या टाकीभोवती रांगोळी काढून पूजन करण्यात आले. शासनाने इंधन दरवाढ तत्काळ कमी करावी यासाठी शासनाच्या विरोधात महिलांनी शंखध्वनी केला. पंतप्रधान मोदींच्या विरोधात जोरदार घोषणाबाजी करण्यात आली.
महागाई आणि दरवाढीमुळे मेटाकुटीला आलेल्या सर्वसामान्य महिलांचे हाल सांगणारे आणि शासनाच्या चुकीच्या धोरणांचा गोरगरीब जनतेला बसलेला फटका याविषयीचे गीत महिलांनी सादर केले. कॉ. उज्ज्वला दळवी, 'दानिविप'चे रमजान अत्तार यांची भाषणे झाली.
प्रांतांना दिलेल्या निवेदनात, लॉकडाऊन काळातील वीज बिलात सवलत द्यावी, इंधन दरवाढ कमी करावी, रेशनकार्ड रद्द करण्याची मोहीम मागे घ्यावी, जीवनावश्यक वस्तूंचे दर कमी करावेत, आदी मागण्यांचा समावेश आहे.
आंदोलनात माजी नगरसेविका अरुणा शिंदे, रूपाली परीट, अलका भोईटे, गीतांजली पालकर, ऊर्मिला कदम, वसुंधरा सावंत, शारदा अजळकर, सुमन सावंत, सुशीला पाटील, नूरजहाँ पेंढारी, सुवर्णलता गोईलकर, साधना पोवार, सविता चव्हाण, अनिता जगताप, आदींसह महिला सहभागी झाल्या होत्या.
------------------------
फोटो ओळी : गडहिंग्लज येथे इंधन दरवाढीच्या निषेधार्थ महिला कृती समितीतर्फे प्रांत कचेरीसमोर शंखध्वनी करून शासनाचा निषेध केला. यावेळी कॉ. उज्ज्वला दळवी, अरुणा शिंदे, अलका भोईटे, गीतांजली पालकर, आदींसह महिला उपस्थित होत्या. (मज्जीद किल्लेदार)
क्रमांक : ०८०३२०२१-गड-०३