कोल्हापूर : येत्या ९ फेब्रुवारीला जिल्ह्यातील ४३३ ग्रामपंचायतींत सरपंच, उपसरपंच निवडीचा धुरळा उडणार आहे. आरक्षण निश्चितीमुळे सरपंचपदाची घोषणेची औपचारिकता राहिली असली तरी समसमान बलाबल, आरक्षित प्रवर्गाचा उमेदवार नसलेल्या गावात मात्र सत्ता स्थापनेवरून राजकारण पेटणार आहे. उपसरपंच पदासाठी गावामध्ये जोरदार फिल्डिंग लावल्याचे चित्र आहे. जिल्हाधिकाऱ्यांनी अधिसूचना जाहीर करीत पीठासीन अधिकाऱ्यांच्याही नियुक्त्या जाहीर केल्या आहे. ग्रामपंचायतीच्या सभागृहात सकाळी ११ वाजता ही निवड होणार आहे.
जिल्ह्यात निवडणूक जाहीर झालेल्या ४३३ पैकी ३८६ ग्रामपंचायतींसाठी मतदान झाले. १४७ ग्रामपंचायती बिनविरोध झाल्या. या सर्व ग्रामपंचायतीच्या सरपंचपदासाठी निवडणुकीनंतर २७ जानेवारीला आरक्षण काढण्यात आले. यानंतर शुक्रवारी जिल्हाधिकारी दौलत देसाई यांच्या आदेशाने निवासी उपजिल्हाधिकारी भाऊसो गलांडे यांनी अधिसूचना काढत सरपंच निवडीचा कार्यक्रम जाहीर केला. निवडीच्या आधी सात दिवस नोटीस द्यावी लागते, त्याप्रमाणे ही नोटीस गावपातळीवर गेली असून, कृषी, महसूल, ग्रामविकास विभागाच्या अधिकाऱ्यांची नियुक्ती पीठासीन अधिकारी म्हणून केली आहे.
चौकट ०१
या गावात सरपंच निवड नाही
गाडेगोंडवाडी, खाटांगळे, उपवडे, भामटे, अरळगुंडी, पट्टणकोडोली, येळाणे, कागणी, चिंचणे, घोसरवाड, राजापूरवाडी, येथे सरपंचपदाचे आरक्षण जाहीर झालेल्या प्रवर्गातील सदस्य नसल्यामुळे येथे सरपंचपदाची निवडणूक होणार नाही. उपसरपंचाची सर्वसंमतीने निवड करून आरक्षण बदलून नवीन सरपंच निवड होईपर्यंत उपसरपंचाकडे तात्पुरता कार्यभार दिला जाणार आहे.
चौकट ०२
उपसरपंचपदासाठी फिल्डिंग
निवडणुकीनंतर आरक्षण पडल्याने सर्वच प्रभाग सरपंचपदाचे आरक्षित असे समजून निवडणूक लढविली गेली. अनपेक्षित आरक्षण पडलेल्या ठिकाणी सरपंचपद राहिना निदान उपसरंपचपद तरी पदरात पाडून घ्यावे यासाठी सदस्यांनी नेत्यांकडे जोरदार फिल्डिंग लावली आहे. इच्छुकांची संख्या जास्त असल्याने सव्वा वर्षाचा फॉर्म्युलाही निश्चित केला जात आहे.
चौकट ०३
वाठार तर्फ वडगाव, मजरेवाडी, किणे या गावात बहुमत एकाकडे आणि सरपंचपद विरोधकांकडे असे त्रांगडे तयार झाले आहे, तर उदगाव या स्वाभिमानी शेतकरी संघटनेचा गड समसमान बलाबलमुळे राहतो, की कोसळतो याकडे संपूर्ण जिल्ह्याचे लक्ष लागून राहिले आहे. येथे सत्ता ठरविणाऱ्या एकमेव सदस्याची पळवापळवी सुरू आहे.
आरक्षण शिरोळ, राधानगरी, करवीर, गडहिंग्लज, आजरा, हातकणंगले, भुदरगड, गगनबावडा, पन्हाळा, कागल, शाहूवाडी, चंदगड
सर्वसाधारण ८ ५ १८ १७ ८ ६ १६ १ १७ १७ १२
सर्वसाधारण स्त्री ८ ८ १५ १४ ८ ६ ११ २ ९ १२ १२
नागरिकांचा मागास प्रवर्ग ५ २ ४ ५ ०२ २ ४ २ ७ १० ७
नागरिकांचा मागास वर्ग स्त्री ५ २ ५ ८ ६ ३ ७ २ २ ६ ४
अनुसूचित जाती ३ १ ४ २ २ १ २ ० ५ ५ ४
अनुसूचित जाती स्त्री ३ १ ७ ३ ० ३ ३ १ २ ३ २
अनुसूचित जमाती ० ० १ ० ० ० ० ० ० ० ०
अनुसूचित जमाती स्त्री १ ० ० १ ० ० ० ० ० ० ०
एकूण ३३ १९ ५४ ५० २६ २१ ४५ ०८ ४२ ५३ ४१