दत्तवाड : येथील ग्रामविकास अधिकारी डी. आर. कांबळे यांनी दोन महिन्यांत केलेल्या ग्रामपंचायतीच्या खर्चाच्या तपशिलाबाबत सोमवारी नूतन ग्रामपंचायत सदस्य व ग्रामस्थांनी ग्रामपंचायतीमध्ये जाऊन जाब विचारला. यावेळी जोरदार वादावादी झाली. तथापि ग्रामसेवक यांनी लेखी अर्ज दिल्याशिवाय माहिती देणार नाही, अशी भूमिका घेतली. त्यानंतर ग्रामपंचायतीला खर्चाबाबत माहितीसाठी अर्ज देण्यात आला. दत्तवाड (ता. शिरोळ) ग्रामपंचायतीवर प्रशासक असून, नुकत्याच निवडून आलेल्या सदस्यांनी ग्रामविकास अधिकारी डी. आर. कांबळे यांच्याकडे मागील दोन महिन्यात प्रशासकीय काळातील केलेले विविध खर्च याविषयी ग्रामपंचायतीमध्ये जाऊन विचारणा केली. या खर्चात अनेक तफावती असल्याचे दिसून येत आहेत. खरेदी केलेल्या वस्तू ग्रामपंचायतीमध्ये जमा न होताच त्या रक्कमा अदा झाल्या असल्याचे दिसून आल्याने याबाबत ग्रामसेवक यांना जाब विचारण्यात आला. वाहतुकीचा खर्च, बल्ब खरेदी, पाणीपुरवठा विभागातील गळती खुदाई याबाबत विचारणा केली.
याबाबत गटविकास अधिकारी शंकर कविकते यांच्याशी संपर्क केला असता, आज मंगळवारी दत्तवाड ग्रामपंचायतीमध्ये बैठक घेणार असल्याचे त्यांनी सांगितले. लेखी मागणी केल्यानंतर सर्व तपशील देणार असल्याची माहिती ग्रामविकास अधिकारी डी. आर. कांबळे यांनी दिली.
यावेळी नूर काले, शेखर कलगी, विवेक चौगुले, बाबूराव पवार, बसगोंडा पाटील, प्रवीण सुतार, अभय चौगुले, प्रमोद पाटील, देवराज पाटील, अक्षय पोवाडी यांच्यासह ग्रामस्थ उपस्थित होते.