‘दौलत’ प्रेमीयुगुलांचा अड्डा

गणेश मंदिर परिसराला अवकळा : सावळा गोंधळ थांबवण्याची मागणी

चंदगड : हलकर्णी (ता. चंदगड) येथील दौलत कारखाना परिसरात असलेल्या गणेश मंदिराला दौलत कारखाना बंद असल्याने अवकाळ प्राप्त झाली असून हा परिसर सध्या प्रेमीयुगुल व मद्यपीचा अड्डा बनला आहे. मंदिरावर सध्या सुरक्षारक्षक नसल्याने रोज ८ ते १० प्रेमीयुगुल येथे दिसत आहेत.दौलत कारखाना व्यवस्थापनाच्या अधिपत्याखाली येथील टेकडीवर सुरेख गणेश मंदिर उभे करण्यात आले आहे. मंदिराची भव्य इमारत, सुंदर बगीचा, कारंजे, विद्युत रोषणाई, टेकडीवरून दिसणारी परिसरातील हिरवीगार शेती यामुळे हे मंदिर एक प्रेक्षणीय स्थळ वाटत होते. अशा ठिकाणी चंदगडसह जवळपास तालुक्यातील शाळांच्या सहलीही येत होत्या. संकष्टी दिवशीही तर येथे गोठी गर्दी असायची. अशा या रमणीय स्थळाला दौलत बंद झाल्याने मरणासन्न अवस्था परसली आहे.दरम्यान, दौलत वसाहतीमध्ये राहणाऱ्या कामगारांनी प्रेमीयुगुलांना बऱ्याच वेळा हकलण्याचा प्रयत्न केला असता ते कामगारांनाच उद्धट उत्तरे देतात. येथील महाविद्यालयातील युवक-युवतींचीही या परिसरात वर्दळ असते. दौलत व्यवस्थापनाने मंदिर परिसरात दौलत विश्वस्त शिक्षक संस्थेचा कर्मचारी पाठवून या ठिकाणी चाललेला सावळा गोंधळ थांबवावा. तसेच परिसराची स्वच्छता करून मंदिराचे पावित्र्य राखावे, अशी मागणी होत आहे. (प्रतिनिधी)

माणसांची वर्दळ कमी
परिसरातील बागेत झुडपे वाढली आहेत. आजूबाजूला असलेली फुलाची झाडे तोडून नेल्याने परिसर भयाण वाटत आहे. ‘दौलत’ बंद झाल्याने मंदिरावर असलेला सुरक्षा रक्षक, वायरमन, माळी आदी कर्मचाऱ्यांनी पाठ फिरविल्याने या ठिकाणी माणसांची वर्दळ कमी झाली.
या परिसरातील प्रेमीयुगुल व बेळगाववरून येणारे प्रेमीयुगुल या मंदिर परिसराचा उपयोग करून घेत आहेत, तर काही मद्यपी युवक येथे बसून दारू पित आहेत. या ठिकाणी प्लास्टिक व काचेच्या बाटल्यांचा खच पडला आहे.