पडदा उघडला, पण नाटकांसाठी प्रतीक्षाच

प्रशासक बलकवडे यांची नाट्य वितरक आनंद कुलकर्णी, मिलिंद अष्टेकर यांनी भेट घेऊन मागणीचे निवेदन दिले. पन्नास टक्के खुर्च्या रिकाम्या ठेवून नाट्य प्रयोग सादर करणे आर्थिकदृष्ट्या परवडणारे नाही. त्यामुळे पुणे, मुंबई, नवीन मुंबई, ठाणे येथील महापालिका प्रशासनाने नाट्यगृहांच्या भाड्यात सवलत दिली आहे. त्याच धर्तीवर कोल्हापुरातही तशी सवलत दिल्यास नाट्य प्रयोग होऊ शकतात याकडे प्रशासकांचे लक्ष वेधण्यात आले. परंतु महापालिकेची आर्थिक स्थिती अडचणीची असल्यामुळे अशी सवलत देणे अशक्य असल्याचे त्यांनी स्पष्ट केले.

त्यामुळे महापालिकेने केशवराव भोसले नाट्यगृह सुरू करण्यास जरी परवानगी दिली असली, तरी व्यावसायिक नाटके होण्याची शक्यता नाही. त्यामुळे नाट्य रसिकांना आणखी काही महिने तरी चांगली नाटके पाहण्यासाठी प्रतीक्षा करावी लागणार आहे. काही कलाकारांनी आपले मानधन कमी केले असले तरीही नाट्यगृहाचे भाडे, तिकीट विक्री आणि निर्मात्यांना द्यावे लागणारे प्रयोगाचे पैसे यांचा कुठेच ताळमेळ बसत नसल्याचे अष्टेकर यांनी सांगितले.